بەهۆی بڕیارێكەوە نرخی ئۆتۆمبێلە بێ سەرەتاكان دابەزیوە
SNN
دوابەدوای بڕیارەكەی هاتووچۆی هەولێر بۆ قەدەغەكردنی ئۆتۆمبێلە بێ سەرەتاكان، لە سنووری سلێمانی-ش دەنگۆی دەستبەسەرداگرتنیان لە سەرەتای ساڵی نوێوە بڵاوبۆتەوە و ئەوەش نرخی ئەو ئۆتۆمبێلانەی دابەزاندووە و بازاڕی كڕین و فرۆشتنیانی وەستاندووە.
سوارە ئەنوەر، نوێنەری خاوەنی ئۆتۆمبێلە بێ سەرەتاكان رایگەیاند، “لەدوای بڵاوبوونەوەی ئەو دەنگۆیەوە، كە دەست بەسەر ئۆتۆمبێلە بێ سەرەتاكاندا دەگیرێت، بەتەواوی بازاڕی كڕین و فرۆشتنی ئەو ئۆتۆمبێلانەی وەستاندووە”.
وتیشی، “بۆ هەر ئۆتۆمبێلێكی بێ سەرەتا، كە زیاتر بە شاهینە و مەلیكە ناسراون نزیكەی 1000 بۆ 1500 دۆلار (10 بۆ 15 گەڵا) دابەزیون و ناشفرۆشرێن ئەوەش بەهۆی بڵاوبوونەوەی ئەو هەواڵەوە، چونكە هەر هەواڵ و دەنگۆیەك كاریگەری لەسەر بازاڕی ئەو ئۆتۆمبێلانە هەیە”.
بەپێی دواین ئاماری نافەرمی، لە هەرێمی كوردستان نزیكەی 70 هەزار ئۆتۆمبێلی بێ سەرەتا بوونیان هەیە و بەشێكی زۆریان كەوتوونەتە سنووری سلێمانی، كە لە جۆرە جیاوازەكانن و زۆرینەشیان لەجۆری “شاهینە و مەلیكە” ناسراون و پێشتر زۆرینەیان بەناوی كەلوپەلی یەدەگەوە داخڵی هەرێم كراون، بەشێوەی “بڕاوە و مووس” و بەشێكیشیان ساخن و لەلایەن هاووڵاتیانەوە بەهۆی هەرزانی نرخەكانیان خواستێكی زۆریان لەسەربوو.
