داهاتی نانەوتی پارێزگای سلێمانی و هەڵەبجە و ئیدارەی گەرمیان بڵاوکرایەوە

SNN

داهاتی نانەوتی ئەم مانگەی سنوری پارێزگاكانی سلێمانی و هەڵەبجە و ئیدارەكانی گەرمیان و راپەڕین، بەراورد بە مانگی رابردوو لە ٪10 كەمیكردووە، هاوکات داهاتی نانەوتی ئەم هەفتەیەش زیاتر لە 21 ملیار دینار بووە.

ئەمڕۆ هەینی 29ی تشرینی دووەم، ماڵپەڕی شەفافیەت بەپێی داتای گەنجینەكانی سلێمانی رایگەیاندووە، داهاتی ئەم مانگەی پارێزگاكانی سلێمانی و هەڵەبجە و ئیدارە سەربەخۆكانی گەرمیان و راپەڕین، 58 ملیار و 624 ملیۆن و 952 هەزار دینارە، بەڵام مانگی تشرینی یەكەم 65 ملیار و 328 ملیۆن و 851 هەزار دینار بووە.

بەگوێرەی ئەو داتایانە بێت، داهاتی ئەم مانگە بەراورد بە مانگی رابردوو لە ٪10 كەمیكردووە، بڕی داهاتەكەش دەكاتە شەش ملیار دینار.

سەبارەت بە داهاتی ئەم هەفتەی سلێمانی و هەڵەبجە و ئیدارەی گەرمیان و راپەڕین ماڵپەڕەکە ئەوەیخستووەتە ڕوو، داهاتی ئەم هەفتەیەی سلێمانی لە 23ی 11 تا 29ی 11ی 2024، زیاتر لە 21 ملیارو 201 ملیۆن و 972 هەزار دینارە.

هاوکات، لەو بڕە 19 ملیارو 842 ملیۆن و 27 هەزار دیناری واتە 94%ی نەختینەیە، 1 ملیارو 359 ملیۆن و 944 هەزار دیناری واتە 6%ی بەشێوەی چەكە و مەقاسە سفرە.