زۆرترین تووشبوونی ئایدز لە شاری هەولێرە

SNN-عەلی حەمە سەعید

ئەمڕۆكە هاوكات لەگەڵ ڕۆژی جیهانی پێشگیری لە تووشبوون بە نەخۆشی ئایدز، پزیشكێكی پسپۆڕ باس لە هۆكارەكانی ئەو نەۆخشییە دەكات و هاوكات بەگوێرەی ئامارەكانی وەزارەتی تەندروستی هەرێمیش لە كۆی 87 كەسی تووشبوو بەو نەخۆشییە زۆرترینیان لە پارێزگای هەولێرن.

كارزان عەبدوڵا، پزیشكی بواری نەخۆشییە گوازراوەكان بە SNNی ڕاگەیاند: نەخۆشی ئایدز یەكێكە لەو نەخۆشیانەی كە لەكەسێكەوە بۆ كەسێكی دیكە دەگوازرێتەوە بەتایبەت لەو كەسانەی كە لەتەمەنی لاویدان و گەنجن، بەڵام یەكێك لە جیاوازییەكانی ئەم نەخۆشییە ئەوەیە كە ڕاستەوخۆ نیشانەكانی بەدەرناكەوێت بەڵكوو بەلایەنی كەم دوای 10 ساڵ نیشانەكانیان دەردەكەوێت.

ئاماژەی بەوەشكرد، هۆكارەكانی توشبوون بەو نەخۆشییە زۆرن گرنگترینیان ئەنجامدانی سێكسی ناتەندروست و هەروەها سەرتاشخانە و ئارایشتگەكان كاتێك ئامێرەكانیان بەبێ‌ پاككردنەوە بۆ چەند كەسێكی جیاواز بە كاربهێنن رێگەی سەرەكین بۆ تووشبوون بە نەخۆشییەكە، ئەوە سەرەڕای ئەوەی كە مادەهۆشبەرەكانیش كاریگەری خراپیان هەیە بۆ توشبوون بەو جۆرە نەخۆشییە.

بە گوێرەی ئامارێكی بەپێی وەزارەتی تەندروستی كە سەرەتای ئەمساڵ بڵاویكردووەتەوە، كۆی تووشبووانی ئەیدز لە هەرێمی كوردستان 87 كەسە؛ 47 لە هەولێر، 30 لە سلێمانی و 10 لە دهۆك، بەشێكی زۆریشیان بیانین.

بە گوێرەی ئەو ئامارانەی لەلایەن خۆپاراستنی تەندروستیی هەولێرەوە بڵاو كراونەتەوە لە پارێزگاكە لە ساڵی 2023دا 48 تووشبووی ئەیدز تۆماركراون، بەڵام لەم ساڵدا 34 تووشبوو تۆماركراون. كە 13ـیان بیانی بوون و 10 كوردی تێدابووە، 11ـشیان لەنێو ئاوارەكان بوون.