فەرمانی پێدانی زەوی بە فەرمانبەرانی چەند بەڕێوەبەرایەتییەكی سلێمانی دەرچوو

SNN-عەلی حەمە سەعید

لەچوارچێوەی فەرمانی پێدانی زەوی بە فەرمانبەرانی وەزارەتە جیاوازەكان، لە ئێستادا فەرمانی پێدانی زەوی بەفەرمانبەرانی سێ‌ بەڕێوەبەرایەتی گشتی لە سلێمانی گەڕاوەتەوە، هاوكات بەچەند قۆناغێكیش 10 هەزار پارەچە زەوی لە سنووری سلێمانی دابەشدەكرێن بەسەر فەرمانبەراندا.

تەلار نەجات، بەڕێوەبەری لیژنەی دابەشكردنی زەوی لە سلێمانی بە SNNی راگەیاند: لەچوارچێوەی ئەو بڕیارەی كە بۆ دابەشكردنی زەوی بەسەر فەرمانبەرانی هەرێمدا دەرچووە، لە سنووری پارێزگای سلێمانیش كارەكانی دابەشكردنی زەوی بەباشی بەڕێوەدەچێت لە قۆناغی یەكەمدا، لە دوای سەرۆكایەتی شارەوانیی سلێمانی، فەرمانی پێدانی زەوی بە فەرمانبەرانی بەڕێوەبەرایەتیی گشتیی شارەوانییەكان، بەڕێوەبەرایەتیی گشتیی كارەبای سلێمانی و بەڕێوەبەرایەتی كار و كاروباری كۆمەڵایەتیی سلێمانی گەڕاوەتەوە.

ئاماژەی بەوەشكرد، دوای گەڕانەوەی فەرمانی پێدانی زەوی بە و سێ‌ بەڕێوەبەرایەتییەی سلێمانی، ئێمەش لای خۆمانەوە نووسراومان ئاراستەی ئەو شوێنانە كردووە، بۆ ئەوەی ناوی فەرمانبەرەكانیان بنێرن و دواتر وردبینی لەناوەكان بكرێت بۆ ئەوەی بەگوێرەی مەرج و ڕێنماییەكان زەوییان بەسەردا دابەشبكرێت.

بەڕێوەبەری لیژنەی دابەشكردنی زەوی لە سلێمانی ئەوەشی خستەڕوو، پێویستە ئەوانەی ناویان بەرز دەكرێتەوە لە فەرمانگەكانیان، بەگوێرەی مەرج و رێنوێنییەكانی وەزارەتی شارەوانی، لە رێگەی فەرمانگە پێوەندیدارەكانی تاپۆوە بسەلمێنرێت كە سوودمەند نەبوون و سەرجەم مەرج و ڕێنماییەكانیان تێدایە بۆ پێدانی زەوی.

ئەوەش لەكاتێكدایە كە شارەوانی سلێمانی ئەوەیان ڕاگەیاندووە كە بە چەند قۆناغێك 10 هەزار پارچە زەوی لە سنوری سلێمانی دەدرێت بەفەرمانبەرانەی كە مەرج و ڕێنماییەكانی پێدانی زەوی دەیانگرێتەوە.