کۆمسیۆن: هەفتەی داهاتوو پارەی کارمەندانی کۆمسیۆنی هەڵبژاردنەکانی پەرلەمانی کوردستان دابەشدەکرێت

SNN-عەلی حەمە سەعید
وتەبێژی كۆمسیۆنی باڵای سەربەخۆی هەڵبژاردنەكان ئاشكرایدەكات تاوەکو ئەمڕۆ پارەی كارمەندانی چاودێری ڕۆژی هەڵبژاردن خەرجنەكراوە، بەڵام بە هەموو ئەگەرێك لەهەفتەی داهاتوو خەرجدەكرێت و لەڕێگەی بانكەكانەوە دابەشدەكرێت.

جومانە غەلای، وتەبێژی كۆمسیۆنی باڵای سەر بەخۆی هەڵبژاردنەكانی عێراق بە SNNی ڕاگەیاند: تاوەکو ئەمڕۆ دووشەممە پارەی كارمەندانی كۆمسیۆن كە لە ڕۆژانی هەڵبژاردن چاودێر بوون خەرجەنەكراوە، بەڵام رێكارەكانی ناردنی پارەی كارمەندانی سەر سندووقەكانی دەنگدان تەواو كران و ئەگەر تاوەکو كۆتایی ئەم هەفتەیە خەرجنەكرێت بەدڵنیایی لە هەفتەی داهاتوو خەرجدەكرێت.

ئاماژەی بەوەشكرد، پارەكە لەلایەن وەزارەتی دارایی عێراقەوە ڕەوانەی هەرێم دەكرێت، پاشان لەڕێگەی بانكەكانەوە دابەشدەكرێت بەسەر ئەو كەسانەی كە لە ڕۆژانی هەڵبژاردن چاودێری كۆمسیۆن بوون لە فەرمانبەران و دەرچووانی زانكۆ و پەیمانگاكان.

هەر كارمەندێكی حكومەت كە بەشداریی لە بەڕێوەبردنی رۆژی دەنگداندا كردبێت، بڕی ئەو پارەیەی وەریدەگریت 150 هەزار دینارە، هاوكات دەرچووی زانكۆ و پەیمانگەكان 250 هەزار و فەرمانبەری یەدەگ 50 هەزار دینار وەردەگرن، زیاتر لە 42 هەزار فەرمانبەر و دەرچووی زانكۆ و پەیمانگەكان، وەك كارمەندی كاتی سەر سندووقەكانی دەنگدان بۆ هەڵبژاردنی پەرلەمانی كوردستان كاریان كرد.