بە هۆی بۆردومانی توركیاوە 11 ئەندامی خێزانێک لە عەین عیسا کوژران

SNN

روانگەى سوورى بۆ مافەکانى مرۆڤ رایگەیاند،  فڕۆکەیەکى بێفڕۆکەوانى تورکیا بۆردوومانى عەین عیساى کردووە و بەهۆیەوە 11 ئەندامى خێزانێک کوژراون.

ئەمڕۆ دووشەممە 9ی کانوونی یەکەم، روانگەی سوری بۆ مافەکانی مرۆڤ لە راگەیەنراوێکدا ئاشکرایکردووە، بەهۆى بۆردوومانکردنى خانوویەک لە گوندی موستەریحەی رۆژئاوای عەین عیسا 11 کەس کە سەرجەمیان ژن و منداڵن کوژراون.

ئاماژە بەوەکراوە، بۆردومانەکە کاتژمێر 11ی دوێنێ شەو لە ڕێی فڕۆکەی بێفڕۆکەوانەوە ئەنجامدراوە، هاوکات عەین عیسا دەکەوێتە باکوورى رەقە و لە چوارچێوەى ئیدارەى خۆسەرەوەیە.

بەگوێرەى ئامارەکانى روانگەى سوورى، بەوەش ژمارەى بۆردوومانەکانى فڕۆکە بێفڕۆکەوانەکانى تورکیا لە ساڵى 2024دا بۆ سەر ئیدارەى خۆسەر بەرزبوونەتەوە بۆ 191 بۆردوومان، کە بەهۆیەوە تاوەکو ئێستا 55 کەس گیانیانلەدەستداوە،  49 ئەندامى هێزە ئەمنییەکان و 73 سڤیل برینداربوون کە شەشیان ژن و سێیان منداڵن.