فراكسیۆنی یەكێتی داواكاری نەخۆشخانەی هیوا دەگەیەنێتە لایەنە پەیوەندیدارەكانی عێراق

SNN-عەلی حەمە سەعید

بەمەبەستی دابینكردنی دەرمان و پێداویستییەكانی نەخۆشخانەی هیوا، لەرێگەی بڕیاردەری فراكسیۆنی یەكێتی داواكاری بەڕێوەبەری تەندروستیی سلێمانی بۆ دابینكردنی دەرمان و داواكارییەكانی نەخۆشخانەی هیوا گەیەندرایە وەزارەتی تەندروستی عێراق و كاری پێویستی بۆكراوە.

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق بەSNNی راگەیاند: لە هەوڵێكماندا بۆ گەیاندنی داواكاری بەڕێوەبەری تەندروستیی سلێمانی بۆ دابینكردنی دەرمان و داواكارییەكانی نەخۆشخانەی هیوا لەلایەن وەزارەتی تەندروستی عێراقەوە، بە نوسراوێك لەلایەن وەزارەتەوە وەڵام دراوەتەوەو ئاڕاستەی لایەنی پەیوەندیدار كراوە.

ئاماژەی بەوەشكرد، دوای گەیاندنی داواكاری بەرێوەبەری تەندروستیی سلێمانی بۆ دابینكردنی دەرمان و پێداویستی پزیشكی، لە نوسراوێكدا كە واژۆی بەڕێوەبەری نوسینگەی وەزیری تەندروستیی عێراقی لەسەرە، داواكارییەكە ئاڕاستەی كۆمپانیای گشتی كڕین و فرۆشتنی دەرمان و پێداویستی پزیشكی كراوە بۆ بەدەنگەوە چون و كاری پێویست و دابینكردنی ئەو دەرمانانەی پێویست بۆ نەخۆشخانەی هیوا.

بڕیاردەری فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، لەسەر ئاستی عێراق و هەرێمی كوردستان نەخۆشخانەی هیوا بووەتە جێگای چارەسەر و هیوای هەزاران توشبووانی نەخۆشی شێرپەنجە، بۆیە خزمەتكردن و دابینكردنی پێداویستییەكانی ئەم نەخۆشخانەیە بە ئەركی سەرشانی خۆمان دەزانین و هەموو هەوڵێك دەدەین ئەوەی پێمان دەكرێت لەوەزارەتی تەندروستیی عێراقەوە وەدەستی بخەین.