“شاندەکەی وەزارەتیی دارایی ئەمڕۆ کێشەکانی پەیوەست بە مووچە چارەسەر دەکەن”

SNN

وەزیری ئاوەدانکردنەوەی عێراق لەبارەی شاندەکەی هەرێمەوە کە ئێستا لە بەغدان رایدەگەیەنێت، هەندێک کێشە لە نێوان وەزارەتیی دارایی هەرێم و دارایی بەغدا هەن، ئەمڕۆ کێشەکان چارەسەر دەبن و سبەینێ رایدەگەیەنن.

ئەمڕۆ یەکشەممە 15ی کانوونی یەکەم ، بەنگین ڕێکانی، وەزیری ئاوەدانکردنەوەی عێراق دەربارەی کێشەی مووچەی مووچەخۆرانی هەرێمی کوردستان ڕایگەیاند، هەندێک لێکتێنەگەیشتن و کێشەی هونەری هەیە لە نێوان وەزارەتی دارایی هەرێم و عێراق.

دەڵێت: “ئێستا شاندێکی وەزارەتی دارایی هەرێم لە بەغدایە و ئەمڕۆ تەواو دەبن و سبەینێ بڕیار دەدرێت و کێشە هونەرییەکان بەرەو چارەسەربوون دەچێت.”

لەبارەی پابەندنەبوونی هەرێم بە داهاتی ناوخۆییەوە ئاشکرایکرد، “هەموو شتێک بەو جۆرە نییە کە حکومەتی بەغدا دەیڵێت، هەندێک وردەکاری هەیە کە ناتوانم ئێستا باسی بکەم.”

هاوکات، ئەمڕۆ شاندێکی حکومەتی هەرێم بە سەرۆکایەتی ئاوات شێخ جەناب، وەزیری دارایی هەرێم گەیشتە بەغدا و بڕیارە لەگەڵ تەیف سامی، وەزیری دارایی عێراق کۆبێتەوە.”

لەوبارەیەشەوە، هونەر جەمال، وتەبێژی وەزارەتی دارایی ڕایگەیاند، ئامانجی سەردانی شاندەکەی هەرێم بۆ بەغدا بۆ چارەسەرکردنی کێشەی مووچەی سێ مانگی کۆتایی ئەمساڵ و تاوتوێکردنی هەمواری یاسای بودجە و پشکی هەرێمی کوردستان دەبێت لە بودجەی گشتیدا.