بێباكی سەرۆكی حكومەت لەم دۆخەی هاتووەتە ئاراوە نیشاندەری ئەوەیە حوكمداری بەمانە ناكرێت
SNN-عەلی حەمە سەعید
كارمەندانی تەندروستی و مامۆستایان و فەرمانبەران ئاماژە بەوەدەكەن لەگەڵ ئەوەی گرنگترین سێكتەرەكانی حكومەت كە پەیوەندی ڕاستەوخۆیان بە ژیانی هاووڵاتیانەوە هەیە داخراون بەهۆی دابەشنەكردنی، بەڵام سەرۆكی حكومەت هێندە بێباكە وەك ئەوەی هیچ ڕووی نەدابێت.
ئاكۆ سەردار، یاریدەدەری پزیشك بە SNNی ڕاگەیاند: دابەشنەكردنی بۆماوەی نزیكەی سێ مانگ و بێباكی سەرۆكی حكومەت و وەزیری دارایی كە كاری راستەوخۆی ئەوانە لە خەمی دابینكردنی مووچەدابن سەلمێنەری ئەوەیە كە ئەمانە بەكەڵكی حوكمداری نایەن و پێویستییەكی هەنووكەییە حوكمڕانی لە هەرێمی كوردستان ڕاستبكرێتەوە.
ئاماژەی بەوەشكرد، لەكاركەوتنی سێكتەرەگرنگەكانی وەك تەندروستی و پەروەردە و كارەبا و شارەوانی و چەندین سێكتەری دیكەی گرنگ بەهۆی دابەشنەكردنی مووچە تەنها لە هەرێمی كوردستان هەیە، هاوكات هاووڵاتیان و فەرمانبەرانیش هیندە بە پەرۆشی ئەم نشتیمانەوەن نایانەوێت بارودۆخە تێكبچێت و دەستبكرێت بە خۆپیشاندانی یەكلاكەرەوە، بەڵام دەستەڵات لەوەتێناگات تاكار لەكار دەترازێت.
نەسرەدین عەبدولڕەحمان، مامۆستای یەكێك لەناوەندەكانی خوێندنی لە سنوری سلێمانی بە SNNی ڕاگەیاند: ئەوەی حكومەتی هەرێم دەیكاتە بانگەوازكردنە بۆ ئەوەی خەڵكی بەزۆر بهێننە سەر شەقام وداوای ڕووخاندنی ئەم دەستەڵاتە بكەن، بەڵام بارودۆخی ناوچەكە و جیهان ڕێگەخۆشكەر نییە بۆ ئەوەی لەوە زیاتر ئەم دۆخە درێژە نەكێشێت و هاووڵاتیان بڕژێنە سەرشەقام بۆ یەكلاكردنەوەی دۆخەكە.
ئەمە لە کاتێکدایە، حکومەتی هەرێم پارەی مووچەی مانگی 10 لەلایە و دابەشی نەکردووە، ئەمڕۆ وەزارەتی دارایی و ئابوری راگەیەنراوێکی بڵاوکردەوە و ئاشکرایکرد، کۆبوونەوەکەیان لەگەڵ وەزارەتیی دارایی بەغدا ئەرێنی بووە و رۆژی سێشەممە دەست بە دابەشکردنی مووچە دەکەن.
