ئێستا کاتی لە ناوبردنی داعش و هێزە کوردییەکانە لە سوریادا
ئەردۆغان
SNN
ڕەجەب تەیب ئەردۆغان سەرۆکی تورکیا دەڵێت ئێستا کاتی لە ناوبردنی ” گروپە تیرۆریستییەکانە ” کە مەترسین بۆ سەر مانەوەی سوریا.
ئەردۆغان دوای گەڕانەوەی لە کۆبوونەوەکەی قاهیرە بە ڕۆژنامەنووسانی وت ” داعش، پارتی کرێکارانی کوردستان و شوێنکەوتووانی، کە مەترسین بۆ سەر مانەوەی سوریا، دەبێت لە ناوببرێن، ئێستا کاتی لە ناوبردنی گروپە تیرۆریستییەکانە لە سوریادا.”
ئەردۆغان ئاماژەی بەوەشکرد ” ڕێوشوێنی ڕێگریکردن ” دەگرێتەبەر دژی ئەو گروپانەی کە مەترسین لەسەر تورکیا، ئەوە مەحاڵە بۆ ئێمە ئەو جۆرە مەترسییە قبووڵ بکەین، هیواشی خواست سەرکردایەتییە نوێیەکەی سوریا کارییان لەگەڵدا نەکات.”
وتی ” پێمان وانیە هیچ دەسەڵاتێک لە ماوەی دواتردا بەردەوام بێت لە کارکردن لەگەڵ ڕێکخراوە تیرۆریستییەکاندا.”
تورکیا هێزەکانی سوریای دیموکراتیک بە ڕێکخراوێکی ” تیرۆریستی ” سەیر دەکات کە یەپەگە سەرکردایەتی دەکات و دەڵێت بەشێکن لە پارتی کرێکارانی کوردستان کە دەیان ساڵە لەگەڵ تورکیادا لە ململانێدان. هێزەکانی سوریای دیموکراتیک هاوپەیمانی ئەمەریکان و شان بە شانی هێزەکانی هاوپەیمانان بە سەرکردایەتی ئەمەریکا ڕۆڵێکی سەرەکییان هەبووە لە لە ناوبردنی خەلافەتی داعشدا لە سوریادا.
