ئەم كابینەیە لەمساڵدا هیچ مووچەیەكی لەكاتی خۆیدا دابەشنەكردووە

SNN-عەلی حەمە سەعید
لەگەڵ ئەوەی لەسەرەتای دەستبەكاربوونیانەوە هەریەكە لە سەرۆكی حكومەت و وەزیری دارایی هەرێم لەچەندین جار و لە چەندین بۆنەدا ئەوەیان دووبارەكردووەتەوە كە دابەشكردنی مووچە لەكاتی خۆیدا دەبێت و هەر 30 ڕۆژجارێك مووچە دابەدەكەن، بەڵام لەماوەی ئەمساڵدا یەك مووچەش لەكاتی خۆیدا دابەنەكراوە.

بەگوێرەی بەدواداچوونەكانی SNNلەماوەی ئەمساڵدا كابینەكەی ( مەسرور بارزانی) نەیتوانی ئەو بەڵێنانە جێبەجێكات كە بە فەرمانبەران و مووچەخۆرانی دابوو كە هەموو 30 ڕۆژجارێك مووچە دابەشدەكرێت، لەكاتێكدا بەغدا پارەی مووچەی ڕەوانە كردووە و هەرێم داهاتەكانیشی نەگەڕاندووەتەوە.

ئاماژە بەوەشكراوە، لەسەرەتای ئەمساڵەوە مووچەی مانگەكان بەم جۆرە دابەشكراوە مانگی یەك لە رۆژی 2/2 دەستكراوە بە دابەشكردنی، مانگی دوو لە 30/3 دەستكراوە بە دابەشكردنی مانگی سێ لە 6/4 دەستكراوە بە دابەشكردنی مانگی چوار لە 15/5 دەستكراوە بە دابەشكردنی مانگی پێنج لە 11/6 دەستكراوە بە دابەشكردنی، مانگی شەش لە 10/7 دەستكراوە بە دابەشكردنی، مانگی حەوت لە 3/9 دەستكراوە بە دابەشكردنی، مانگی هەشت لە 4/10 دەستكراوە بە دابەشكردنی، مانگی نۆ لە 18/10 دەستكراوە بە دابەشكردنی، مانگی 10 لە17/12 دەستكرا بە دابەشكردنی و هێشتا مووچەی مانگی 11 دابەشنەكراوە و دیاریش نییە مووچەی مانگی 12 دابەشدەكرێت یاخود نا.

بەدواداچوونەكەی SNNلە كاتێكدایە كە سەرەڕای ئەوەی بڕیاری دادگای فیدراڵی هەیە بۆ جیاكردنەوەی مووچە لە ململانێ‌ سیاسییەكان و هەردوو حكومەتی هەرێم و عێراقی پابەند كردووە بە دابەشكردنی مووچە لەكاتی خۆیدا، بەڵام بەهۆی ئەوەی هەرێم پابەند نەبووە بە بڕیارەكەی دادگای فیدراڵی لە بابەتی گەڕاندنەوەی داهاتی ناوخۆ و تەوتینی مووچەی فەرمانبەران، بووەتە هۆی ئەوەی مووچە لەكاتی خۆیدا دابەشنەكرێت.