كۆمیسیۆن وادەی ناردنی پارەی چاودێرانی سەرسندوقەكانی هەڵبژاردنی ڕاگەیاند

SNN-عەلی حەمە سەعید

وتەبێژی كۆمسیۆنی باڵای سەربەخۆی هەڵبژاردنەكانی عێراق  ئاماژە بەوەدەكات، سەرجەم كاروبارەكانی تایبەت بە ناردنی شایستە داراییەكانی كارمەندانی كۆمسیۆن كە لە هەڵبژاردنی پەرلەمانی هەرێمی كوردستاندا لەسەر سندوقەكانی دەنگدان بەشداریی پرۆسەكەیان كردووە تەواو بووە و لە هەفتەی داهاتوودا لە رێگەی بانكی بازرگانی عێراقەوە رەوانەی هەرێمی كوردستان دەكرێت.

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بەSNNی ڕاگەیاند: دوای ئەوەی وردەكارییەكانی تایبەت بە پێدانی شایستە داراییەكانی كارمەندانی بەشدار لە پرۆسەی هەڵبژاردنی پەرلەمانی هەرێم تەواو بوو، لەهەفتەی داهاتوو لەڕێگەی بانكی بازرگانی عێراقەوە پارەكەیان ڕەوانە دەكرێت و دەستدەكرێت بەدابەشكردنی.

ئاماژەی بەوەشكرد، شایستە داراییەكانی كارمەندانی كۆمسیۆن كە لە هەڵبژاردنی پەرلەمانی هەرێمی كوردستاندا لەسەر سندوقەكانی دەنگدان بەشداریی پرۆسەكەیان كردووە بەجۆرێكە كە ئەو چاودێرانەی دامەزراون لە داموودەزگاحكومەییەكان بڕی 150 هەزار دینار و ئەوانەشی كە دەرچووی زانكۆ و پەیمانگاكانن بەڵام دانەمەزراون بڕی 250 هەزار دیناریان پێدەدرێت.

وتەبێژەكەی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، زیاتر لە 40 هەزار كارمەند بەشدارییان لەبەڕ‌ێوەبردنی هەڵبژاردنی پەرلەمانی هەرێمی كوردستان كردووە، جگە لەو كەسانەشی كە بەشداری پرۆسەكەیان كردووە پارە وەردەگرن، بەهەمان شێوەش ئەوانەی ناویان بە یەدەگ هاتووەتەوە بڕی 50 هەزار دیناریان پێدەدرێت.