لەسایەی كابینەكەی مەسرور بارزانی هەڵەبجە پەراوێزترین پارێزگای هەرێمی كوردستان بووە

SNN-عەلی حەمەسەعید

بەگوێرەی دواین راپۆرت و ئاماری دەستەی وەبەرهێنانی هەرێم دەردەكەوێت، “لە سایەی كابینەكەی مەسرور بارزانی سەرۆكی حكومەتی هەرێم پارێزگای هەڵەبجە بە پەراوێزخراوترین پارێزگاكانی هەرێمی كوردستان دەردەكەوێت، بەجۆرێك تەنها لە %0.6 ی كۆی گشتی قەبارەی وەبەرهێنان لە هەڵەبجە بووە و پاریزگاكانی هەولێر و دهۆك پشكی شێریان بەركەوتووە.”

بەگوێرەی ئەو داتاو ئامارانەی كە لە دەستەی وەبەرهێنەرانی هەرێم بە SNNدراوە ئەوەخراوەتەڕوو، لەكۆی هەزار و 303 پرۆژەی وەبەرهێنان كە لە پارێزگاكانی هەرێم ئەنجام دراون تەنها شەش پرۆژە لە سنوری پارێزگای هەڵەبجە ئەنجامدراون، لەكاتێكدا لە هەولێر 566 پرۆژەو لە دهۆك 305 پرۆژە و لە سلێمانی 275 پرۆژە ئەنجام دراون.

ئاماژە بەوەشكراوە، كۆی قەبارەی وەبەرهێنان لە هەرێمی كوردستان گەیشتووەتە نزیكەی 72 ملیار دۆلار، پارێزگای هەولێر لە 62.41%ی كۆی گشتی وەبەرهێنانی كوردستانی بەركەوتووە، كە بە سەرمایە دەكاتە 44 ملیار و 931 ملیۆن دۆلار،پارێزگای سلێمانی بە پشكی 25.2% لە ریزبەندیی دووەمدا دێت، بڕی 18 ملیار و 142 ملیۆن و 254 هەزار دۆلار وەبەرهێنان كراوە، لە پارێزگای دهۆك 8.59%ی پشكی وەبەرهێنانی بەركەوتووە و بڕی شەش ملیار و 187 ملیۆن و 386 هەزار دۆلار وەبەرهێنان كراوە، پارێزگای هەڵەبجە لە %0.6 ی بەركەوتووە و قەبارەی وەبەرهێنان بریتی بووە لە بڕی 41 ملیۆن و 17 هەزار دۆلار.

بەوتەی هاووڵاتیانی هەڵەبجە و چاودێرانی سیاسی، ئەم كابینەیەی مەسرور بارزانی سەرەڕای ئەوەی هەر لە سەرەتای دەستبەكار بوونیەوە جیاوازییەكی زۆری دەكرد لە نێوان پارێزگاكانی هەرێمی كوردستان لە جێبەجێكردنی پرۆژەی خزمەتگوزاری، بەڵام پارێزگای هەڵەبجەی بە پارێزگایەکی پەراوێزخراو جێهێشتووە و لەماوەی دەستبەكاربوونی سەرۆكی حكومەت تەنها یەك جار سەردانی هەڵەبجەی كردووە.