حکومەتی عێراق هاوکارییە مرۆییەکانی بۆ لوبنان و غەززە راگرت

SNN

راویژکاری سەرۆکوەزیرانی عێراق رایگەیاندووە، حکومەتی عێراق هاوكارییە مرۆییەكانی بۆ كەرتی غەززە و لوبنان بەهۆی نەبوونی رێگەی وشكانی و ئاسمانییەوە رادەگرێت.

ئەمڕۆ دووشەممە 30 کانوونی یەکەم، زیدان خەڵەف عەتوان راوێژكاری سەرۆكوەزیرانی عێراق بۆ مافەكانی مرۆڤ و سەرۆكی لیژنەی باڵای هاوكاریكردنی لوبنان و كەرتی غەززە رایگەیاند، لە ناوخۆی عێراق و بە تایبەتیش رێكخراوە مرۆییەكان بەردەوامن لە كۆكردنەوەی هاوكاری مرۆیی بۆ فەڵەستین و لوبنان كە پێشتر سەرجەم هاوكارییەكان لە رێگەی سوریاوە دەگەیەنرانە ئەو دوو وڵاتە.

ئاماژەی بەوەکردووە، تائێستا هەزاران تۆن هاوكاری مرۆیی وەك پێداویستی تەندروستی و خۆراكی بۆ لوبنان و كەرتی غەززە رەوانەكراون، بەڵام لە ئێستادا هیچ رێگەیەكی وشكانی و ئاسمانی بەردەست نییە و لەبەرئەوە ناردنی سەرجەم هاوكارییەكان لە عیراقەوە بۆ كەرتی غەززە و لوبنان راگیراون.