ئەگەر جموجوڵی گروپە چەكدارەكان بەردەوام بێت سزای ئابوری عێراق دەدرێت
جەمال کۆچەر
SNN-عەلی حەمە سەعید
ئەندامێكی لیژنەی دارایی لە ئەنجومەنی نوێنەرانی عێراق ئاماژە بەوەدەكات ئەگەر لە ساڵی نوێدا جموجوڵی گروپەچەكدارەكانی عێراق بەردەوامییان هەبێت و ببنە هەڕەشە بۆسەر وڵاتانی دەرەوە، ئەوا لیلایەن ئیدارەی نوێی ئەمەریكاوە سزای دارایی عێراق دەدرێت و ئەوكات بارودۆخە هێندەی دیكە خراپ دەبێت.
د. جەمال كۆچەر، ئەندامی لیژنەی دارایی لە ئەنجومەنی نوێنەرانی عێراق بە SNNی ڕاگەیاند: لەماوەی ئەمساڵدا چەند قەیرانێكی ئابوری بەرۆكی عێراقیان گرتبوو بەتایبەت ناجێگری نرخی دۆلار و دینار و كەمبوونەوەی داهاتی ناوخۆ و هەروەها بەرز و نزمی نرخی نەوت لە بازاڕەكانی جیهان، هاوكات هەڕەشەكانی ئەمەریكاش بۆسەر عێراق ئەگەرێكی كراوەیە لە حاڵەتێكدا ئەگەر جموجوڵی سەربازی گروپە چەكدارەكانی عێراق بەردەوامییان هەبێت.
ئاماژەی بەوەشكرد، ئەگەر لە ساڵی داهاتوودا جموجوڵی سەربازی ئەو گروپانە بەردەوامی هەبێت و ببنە هەڕەشە بۆ سەر وڵاتانی دەوروبەر، ئەوا بەدڵنیایی ئیدارەی نوێی ئەمەریكا بە سەرۆكایەتی دۆناڵد ترەمپ، سزای دارایی بەسەر عێراقدا دەسەپێنێت ئەوكات بارودۆخی دارایی عێراق زۆر خراپ دەبێت و گۆڕانكاری گەورەش لە نرخی دۆلار و دینار ڕوودەدات.
ئەو ئەندامەی لیژنەی دارایی لە ئەنجومەنی نوێنەرانی عێراق ئەوەشی خستەڕوو، ئەگەر لە ساڵی نوێدا نرخی بەرمیلێك نەوت بۆ 60 دۆلار داببەزێت ئەوا عێراق ڕووبەڕووی گرفتێكی ڕاستەقینە دەبێتەوە كە دوورنییە توانای دابینكردنی مووچەی مووچەخۆرەكانی نەمێنێت.
