لەساڵی رابردوودا زیاتر لە 172 هەزار ئۆتۆمبێل هاوردەی هەرێم كراوە

SNN-عەلی حەمە سەعید

بەڕێوەبەری گشتی  بازرگانی لە وەزارەتی بازرگانی و پیشەسازیلا حكومەتی هەرێم ئاماژە بەوەدەكات لە ساڵی ڕابردوودا بەشێوەیەكی گشتی 924 مۆڵەتی هاوردەكردنی ئۆتۆمبێلیان بە كۆمپانیا و بازرگانان داوە و هەر لەو ساڵەشدا 172 هەزار ئۆتۆمبێل هاوردەكراون.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: ئەمساڵ ژمارەی مۆڵەتدان و هاوردەكردنی ئۆتۆمبێل بۆ هەرێمی كوردستان زیادیان كردووە، بەجۆرێك لە هەریەكە لە دەروازەكانی ئیبراهیم خەلیل، پەروێزخان و باشماخ 172 هەزار و 234 ئۆتۆمبێل لە وڵاتەكانی وەك چین، ژاپۆن، ئەمریكا و وڵاتانی كەنداو هاوردەی هەرێمی كوردستان كراون.

ئاماژەی بەوەشكرد، ئەو ئۆتۆمبێلانەی لەماوەی 12 مانگی ساڵی ڕابردوو هاوردەی هەرێمی كوردستان كراون لە دەروازە سنورییەكانی هەرێمی كوردستانەوە، سەرجەمیان بۆ پارێزگاكانی هەرێم نەبوون، بەڵكوو بەشێك لەو ئۆتۆمبێلانە بۆ شارەكانی دیكەی عێراق ڕۆیشتوون لەڕێگەی كۆمپانیا و بازرگانانەوە.

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئەوەشی خستەڕوو، لەساڵی 2023 بەكۆی گشتی تەنها 900 مۆڵەت بە بازرگانان دراوە بۆ هاوردەكردنی ئۆتۆمبێل كە لەو ساڵەدا 122 هەزار ئۆتۆمبێلیش هاوردە كرابوو، بۆیە ساڵی ڕابردوو بەراورد بە ساڵی 2023 دەردەكەوێت كە 50 هەزار ئۆتۆمبێل زیاتر هاوردە كراوە.