ناوەڕۆکی کۆبوونەوەی مەسرور بارزانی و ئەردۆغان ئاشکرا دەکرێت

SNN

مەسرور بارزانی و رەجەب تەیب ئەردۆغان کۆبوونەوە، حکومەتی هەرێمی کوردستان دەڵێت، هەردوولا جەختیان لە چارەسەرکردنی کێشەکانی نێوان هەولێر و بەغداد کردووەتەوە.

رۆژی سێشەممە، 7ـى 1ـى 2025، مەسرور بارزانی، سەرۆکوەزیرانی هەرێمی کوردستان سەردانی تورکیای کرد و لە کۆشکی کۆماری لە ئەنقەرە لەگەڵ رەجەب تەیب ئەردۆغان، سەرۆککۆماری تورکیا کۆبووەوە.

بەگوێرەی راگەیەندراوی حکومەتی هەرێمی کوردستان، لە کۆبوونەوەکەدا بەهێزکردنی پەیوەندیی دوولایەنە و دوایین پەرەسەندن و پێشهاتەکانی عێراق و گۆڕانکارییەکانی ناوچەکە و سووریا تاوتوێ کران.

لە بەشێکی دیکەی کۆبوونەوەدا، وەکو لە راگەیەندراوەکەدا هاتووە، “جەخت لە گرنگیی چارەسەرکردنی کێشەکانی نێوان هەرێمی کوردستان و حکومەتی فیدراڵ لەسەر بنەمای دەستوور و نەهێشتنی ئاستەنگەکانی بەردەم هەناردەکردنەوەی نەوتی هەرێمی کوردستان کرا.”

لەبارەی دۆخی سووریا، حکومەتی هەرێمی کوردستان دەڵێت، “هەردوولا هاوڕابوون لەسەر پێویستیی پاراستنی ئارامی و ئاسایش و مافی گشت پێکهاتەکانی ئەو وڵاتە.”