وادەی گەیشتنی بڕە پارەیەكی دیكە بۆ هەرێمی كوردستان ڕاگەیەندرا
SNN-عەلی حەمە سەعید
ئەندامێكی لیژنەی كشتوكاڵ لە ئەنجومەنی نوێنەرانی عێراق ئاماژە بەودەكات بڕیارە ئەمڕۆ یان سبەی بڕی 19 ملیار دینار لە پارەی شایستەی جوتیارانی سنوری پارێزگای سلێمانی و هەڵەبجە ڕەوانەی هەرێمی كوردستان بكرێت.
غەریب ئەحمەد، ئەندامی لیژنەی كشتوكاڵ لەئەنجومەنی نوێنەرانی عیراق بەSNN ی راگەیاند: بڕیارە ئەمڕۆ یان سبەی بڕی 19 ملیار دینار پارەی گەنمی جوتیاران بگاتە پارێزگای سلێمانی و لەرۆژانی داهاتوودا بەسەر جوتیاراندا دابەشدەكرێت.
ئاماژەی بەوەشكرد، كۆی گشتی پارەی تەرخانكراوی شایستەی پارەی گەنمی جوتیاران بۆ هەر سێ پارێزگاكەی هەرێم بریتییە لە بڕی 125 ملیارو 852 ملیۆن و 997 هەزار دینار، لە بڕە پارەیەش بۆ پارێزگای سلێمانی 47 ملیارو 642 ملیۆن و 421 هەزار دینار تەرخانكراوە، كە ئەمڕۆ یان سبەی بڕی 19 ملیار دیناری دەگاتە پارێزگاكە.
ئەو ئەندامەی لیژنەی كشتوكاڵ لەئەنجومەنی نوێنەرانی عێراق ئەوەشی خستەڕوو، لەكۆی ئەو 125 ملیارەی تەرخانكراوە بڕی 44 ملیارو 45 ملیۆن و 43 هەزار دیناری بۆ پارێزگای هەولێر هاوكات بۆ پارێزگای دهۆكیش بڕی 34 ملیار و 165 ملیۆن و 533 هەزار دینار تەرخانكراوە.
