ئەگەر حكومەتی هەرێم پابەند نەبێت بە رادەستكردنی داهات ساڵێكی سەخت چاوەرێی فەرمانبەرانی هەرێم دەكات

SNN-عەلی حەمە سەعید

ئەندامێكی پێشووی ئەنجومەنی نوێنەرانی عێراق ئاماژە بەوەدەكات، ئەگەر حكومەتی هەرێم پابەند نەبێت بە ڕادەستكردنی داهات ئەوا ساڵێكی سەخت چاوەرێی فەرمانبەرانی هەرێم دەكات، جەختیش دەكاتەوە حكومەتی هەرێمی كوردستان ئەو نەوتەی كە فرۆشتوویەتی قەرزی دوو كۆمپانیای پێ داوەتەوە.

ئەحمەد حاجی ڕەشید، بڕیاردەری لیژنەی دارایی لە پێشووی ئەنجومەنی نوێنەرانی عێراق بە SNNی ڕاگەیاند: لەگەڵ ئەوەی تا ئێستا هیچ ئاماژەیەكی فەرمی نییە بۆ كشانەوە لە بەغدا، بەڵام ئەگەر لە حاڵەتێكدا پەنا بۆ ئەو هەنگاوە ببرێت بەدڵنیایی حكومەتی هەرێم و فەرمانبەرەكانی زەرەرمەندی یەكەم دەبن وەك ئەوەی لە دەرئەنجامی ڕیفراندۆم بینیمان.

ئاماژەی بەوەشكرد، حكومەتی هەرێم دەیتوانی مووچەی مانگی 12 ی فەرمانبەرانی هەرێم دابەشبكات، بەڵام دیارە ئەو مووچەیەی خواردووە، چونكە وەزارەتی دارایی عێراق تەواوی پارەی مووچەی ساڵی 2024ی فەرمانبەرانی هەرێمی كوردستانی ناردووە.

ئەو ئەندامەی خولی پێشووی پەرلەمانی عێراق ئەوەشی خستەڕوو، ئەگەر حكومەتی هەرێم پابەند نەبێت بە ڕادەستكردنی داهاتەكان ئەوا ساڵێكی سەخت بۆ فەرمانبەرانی هەرێمی كوردستان بەڕێوەیە، هاوكات حكومەتی هەرێم لە كۆبوونەوەكەی لەگەڵ نوێنەرانی كورد لە بەغدا ڕایگەیاندبوو كە داهاتی ئەو نەوتەی فرۆشتوویانە قەرزی كۆمپانیاكانی ڕۆز نەفتی ڕووسی و دانەغازی ئیماراتییان پێ داوەتەوە.