ماڵپەڕی شەفافیەت: داهاتی یەک هەفتەی سلێمانی و هەڵەبجە زیاتر لە 11 ملیار دینارە

SNN-

ماڵپه‌ڕی شه‌فافیه‌ت داهاتی یه‌ك هه‌فته‌ی پارێزگای سلێمانی و هەڵەبجەی بڵاوکردەوە و رایگەیاند: له‌ رۆژی 11-1تا ئه‌مڕۆ 17-1-2025, بڕی 11 ملیار و 580 ملیۆن دیناری تێپه‌ڕاندوه‌ و 87%ی داهاته‌كه‌ش به‌شێوه‌ی نه‌ختینه‌یه‌.

ماڵپه‌ڕی شه‌فافیه‌ت بۆ چاودێری و رێكخستنی داهاته‌ نانه‌وتییه‌كانی سلێمانی و هه‌ڵه‌بجه‌ و هه‌ردو ئیداره‌ی راپه‌ڕین و گه‌رمیان داهاتی یه‌ك هه‌فته‌ی بڵاوکردووەتەوە و دەڵێت: ‌داهاتەکە 11 ملیار و 580 ملیۆن و 204 هه‌زار و 850 دینار بوه‌، به‌جۆرێك كه‌ 87% ی داهاته‌كه‌ به‌شێوه‌ی نه‌ختینه‌یه‌ و 13%ی به‌شێوه‌ی چه‌كه‌.

بەگوێرەی ئامارەکانی ماڵپەڕەکە، 10 ملیار و 82 ملیۆن و 272 هه‌زار و 750 دیناری واتا 87%ی داهاته‌كه‌ به‌ شێوه‌ی نه‌ختینه‌یه‌ و هه‌روه‌ها ملیارێك و 497 ملیۆن و 932 هه‌زار و 100 دیناری، واتا 13% به‌شێوه‌ی چه‌كه‌.

رۆژی 15ی کانوونی یەکەمی 2022 ماڵپەڕی شەفافیەت بۆ چاودێری و رێکخستنی داهاتە نانەوتییەکانی سلێمانی و هەڵەبجە لەلایەن قوبادتاڵەبانی، جێگری سەرۆکی حکومەتی هەرێم دامەزرا.