لە كۆی 22دەروازە كاری 18یان بە ئەلیكترۆنی كراوە
د. نەرمین مەعروف
SNN-عەلی حەمەسەعید
ئەندامێكی لیژنەی دارایی لە ئەنجوومەنی نوێنەرانی عێراق ئاماژە بەوە دەكات، لە كۆی 22دەروازەی سنووی كاری 18 دەروازەیان بە ئەلیكترۆنی كراون، هاوكات دەروازە سنورییەكانی هەرێم بە ئەلیكترۆنی نەكراون.
د.نەرمین مەعروف، ئەندامی لیژنەی دارایی لە ئەنجومەنی نوێنەرانی عێراق بە SNNی ڕایگەیاند: لە كۆبوونەوەی لیژنەی دارایی پەرلەمان بە میوانداریی سەرۆكی دەستەی گشتیی گومرگ و سەرۆكی دەستەی گشتیی باجەكان و شاندی یاوەریان، لە چوارچێوەی چاودێریكردن و بەدواداچوونی لیژنە بۆ كاری دامەزراوە داراییە فیدراڵییەكان بەڕێوەچوو.
ئاماژەی بەوەشكرد، لەكۆبوونەوەكەدا بڕی داهاتە نانەوتییە بەدەستهاتووەكان لە بودجەی ساڵی 2024 و پلانی گەشەپێدانی ئەو داهاتانە لە ساڵی 2025 تاوتوێكرا.
ئەوەشی خستەڕوو، لە كۆبوونەوەكە سەرۆكی دەستەی گشتی گومرگی عێراق باسی لە كاری دەروازە نێودەوڵەتییەكانی عێراق كرد كە ئێستا لە كۆی 22دەروازە (جگە لە دەروازەكانی هەرێم) كاری 18 یان بە ئەلیكترۆنی كراوە.
ئەو ئەندامەی لیژنەی دارایی لە ئەنجومەنی نوێنەرانی عێراق ئەوەشی خستەڕوو، لە كۆبوونەوەكەدا سەرۆكی دەستەی گشتیی باجەكانی عێراق باسی لە ڕێككەوتنی 13 خاڵی نێوان هەرێم و حكومەتی فیدراڵ كرد سەبارەت بە پابەندی و ڕێكارەكانی سەپاندنی باجەكان لەنێوان هەردوو حكومەت.
