بڕیاری كۆتایی لەبارەی چارەنووسی مووچەی مانگی 12 دەدرێت

SNN-عەلی حەمە سەعید

لەگەڵ ئەوەی تا ئێستا دیار نییە كە ئەو مووچەیەی لە داهاتوودا دابەشدەكرێت مووچەی مانگی 12 یان مووچەی مانگی یەكی ساڵی نوێیە، بەڵام وابڕیارە لەم هەفتەیەدا ئەو بابەتە یەكلای بكرێتەوە و ڕاپۆرتێكی تایبەت بدرێتە سەرۆكوەزیرانی عێراق و ئەویش بڕیاری كۆتایی بدات.

بەگوێرەی ئەو زانیارییانەی كە لەبەرپرسێكی وەزارەتی دارایی هەرێم بە SNNدراون ئەوەخراوەتەڕوو، دوای گەڕانەوەی محەمەد شیاع سودانی سەرۆكوەزیرانی عێراق لە بەریتانیا، چاوەڕێی ئەو لیژنەیە دەكات ڕاپۆتێكی بۆ ئامادە بكەن كە لیژنەی دارایی پەرلەمانی عێراق پێكی هێناوە لەبارەی بڕی ئەو پارانەی كە بۆ هەرێم نێردراون و بڕی ئەو پارانەشی كە پێویست بوو بۆ مووچە ڕەوانە بكرێت، پاشان سەرۆك وەزیرانی عێراق بریاری كۆتایی لەسەر ئەو بابەتە دەدات.

ئاماژە بەوەشكراوە،بڕیارە لە كۆبونەوەی داهاتووی ئەنجومەنی وەزیرانی عێراق باس لە ناردنی پارە بۆ مووچەی مانگەكانی ئەمساڵی 2025 هاوكات جەخت لە بڕیاری دادگای فیدڕاڵی بكرێتەوە كە نابێت هیچ یەكێك لە بەغدا و هەرێم بەهانە بۆ دواخستنی دابەشكردنی مووچەی مووچەخۆرانی هەرێم بهێننەوە.

ئەوەش لەكاتێكدایە كە ئەمڕۆ د. نەرمین مەعروف، ئەندامی لیژنەی دارایی لە پەرلەمانی عێراق ئەوەشی بە SNNڕاگەیاند كە سبەی یەكشەممە لیژنە تایبەتەكەی دارایی پەرلەمانی عێراق دەستبەكارەكانی دەكات و بەدواداچوون بۆ بڕی ئەو پارانە دەكات كە لەساڵی ڕابردوو عێراق بۆ هەرێمی ناردووە.