سەرجەم هاوکارییەکانی دەرەوەمان راگرتووە جگە لە ئیسڕائیل و میسر

SNN

مارکۆ روبیۆ، وەزیری دەرەوەی ئەمریکا، فەرمانی راگرتنی سەرجەم هاوکارییە دەرەکییەکانی دەرکردووە، جگە لەو هاوکارییانەی لە بودجەی وڵاتەکەدا بۆ ئیسرائیل و میسر تەرخانکراون.

بەپێی یاداشتەکەی روبیۆ، نابێت هیچ بودجەیەکی هاوکاریی نوێ، بۆ هیچ لایەنێک دیاریبکرێت یان درێژبکرێتەوە، ئەوەش خراوەتەڕوو، کە نابێت هیچ جۆرە بودجەیەکی هاوکاری پێداچوونەوەی بۆ بکرێت و پەسەند بکرێت، ئەمەش بەگوێرەی کارنامەی دۆناڵد ترەمپ، سەرۆکی ئەمریکا، بەڵام فەرمانەکە یارمەتییە خۆراکییە فریاگوزارییەکان و هاوکارییەکانی ئیسرائیل و میسر ناگرێتەوە، کە زۆرترین هاوکاریی سەربازییان لەلایەن ئەمریکاوە پێدەگات.

بەپێی یاداشتەکەی وەزیری دەرەوەی ئەمریکا بێت، سەرجەم هاوکارییەکانی ئەمریکا بە سەربازی و لۆجستیەوە بۆ وڵاتی ئۆکرانیا راگیراوە، بەپێی فەرمانکەی ترەمپیش دەبێت ئەم یاداشتە لە ماوەی 90 رۆژدا جێبەجێ بکرێت.