“پرسی منداڵە ونبووەكانی هەڵەبجە شاندێكی عێراق دەنیرێتە ئێران”
چرۆ حەمەشەریف
SNN-عەلی حەمە سەعید
ئەندامێكی ئەنجوومەنی نوێنەرانی عێراق لە فراكسیۆنی یەكێتی ئاماژە بەوەدەكات بە مەبەستی سۆراغی منداڵە ونبووەكانی هەڵەبجە شاندێك سەردانی ئێران دەكات و داوا دەكرێت لە پەرلەمانی ئێران بابەتی منداڵە ونبووەكانی هەڵەبجە بخرێتە بەرباس.
چرۆ حەمە شەریف، ئەندامی ئەنجوومەنی نوێنەرانی عێراق لە فراكسیۆنی یەكێتی بە SNNی ڕاگەیاند: لە چوارچێوەی هەوڵەكانی فراكسیینەكەمان بۆ بەدەمەوە چوونی داخاوازی هاووڵاتیان، ماوەیەكی زۆرە سەرقاڵی بەدواداچوونین بۆ ئەوەی پرسی منداڵە ونبووەكانی هەڵەبجە لەڕێگەی وەزارەتی دەرەوە عێراقەوە بهێنینەوە بەرباس و هەوڵەكان بۆ سۆراغی منداڵە ونبووەكان دەستپێبكەینەوە.
ئاماژەی بەوەشكرد، لەگەڵ وەزارەتی دەرەوەی عێراق گەیشتووینەتە ئەوەی كە بە مەبەستی سۆراغی منداڵە ونبووەكانی هەڵەبجە شاندێكی عێراق سەردانی ئێران بكات، بۆ ئەومەبەستەش نوێنەری وەزیری شەهیدانی هەرێم، نوێنەری وەزارەتی داد، تەندرووستی، باڵیۆزی ئێران، كونسوڵی عێراق لە ئێران، پزیشكی داد و كۆمەڵێك دادوەر هاتوونەتە ناو بابەتەكەوە.
ئەو ئەندامەی ئەنجومەنی نوێنەرانی عێراق ئەوەشی خستەڕوو، وەك نوێنەرێكی هەڵەبجە لە پەرلەمانی عێراق داوامانكردووە كە كۆبوونەوەیەكی تایبەت بە پرسی منداڵە ونبووەكانی هەڵەبجە ببرێتە پەرلەمانی ئێران بۆ ئەو مەبەستە پێش ساڵیادی كیمیابارانی هەڵەبجە شاندێك بە نوێنەرایەتیی بریكاری وەزارەتی دەرەوەی عێراق لەگەڵ وەزیری شەهیدان و منیش وەك پەرلەمانتار و داواكاری بابەتەكە دەچینە وڵاتی ئێران هەوڵەكانمان بەگەڕ دەخەین.
