ترەمپ جەخت لەسەر چۆڵکردنی غە*ززە و گواستنەوەی خەڵکەکەی بۆ میسر و ئوردن دەکاتەوە

SNN-

سەرۆکی ئەمریکا جەخت لەسەر چۆڵکردنی غەززە دەکاتەوە و گواستنەوەی خەڵکەکەی بۆ میسر و ئوردن دەکاتەوە و دەڵێت: غەززەییەکان باشترە لە شوێنێکی دیکە بژین لەجیاتی ئەوەی لەو “شەڕ و ئاژاوەیەدا” بن. بۆ ئە مەبەستەش لەگەڵ سەرۆکی ئەو دوو وڵاتە قسەی کردووە.

رۆژی دووشەممە، 27ی کانوونی دووەمی 2025، لەکاتی گەڕانەوەی بۆ کۆشکی سپی ترەمپ لەنێو فڕۆکەی سەرۆکایەتیدا وەڵامی پرسیاری رۆژنامەوانانی دایەوە و لەبارەی چارەنووسی دانیشتووانی کەرتی غەززە، رایگەیاندووە: “حەز دەکەم ئەوان لە ناوچەیەک بژین، بێ ئەوەی رووبەڕووی شەڕ و ئاژاوە و شۆڕش ببنەوە.”

دەشڵێت:” بۆ ئەو مەبەستەش لەگەڵ شای ئوردن و سەرۆکی میسر قسەم کردووە، وەڵامی عەبدولفەتاح سیسی، سەرۆکی میسر ئەوە بوو کە دەیەوێت ئاشتی لە رۆژهەڵاتی نێوەڕاست بەرقەرار بێت، منیش حەز دەکەم ئاشتی لە رۆژهەڵاتی نێوەڕاست بەرقەرار بێت.”

راشیگەیاند:”منیش حەز دەکەم، هیواخوازم سیسی هەندێک خەڵک وەربگرێت. ئێمە هاوکاری زۆرمان کردوون، دڵنیام ئەویش هاوکارییمان دەکات، ئەو دۆستی منە و ئەو لە ناوچەیەکی دژواردایە، بەڵام پێموابێت ئەو دەیکات و پێموابێت شای ئوردنیش دەیکات”.

لەدوای راگەیاندنی ئەو پلانەی بۆ رۆژنامەوانان لە رۆژی شەممە، 26ی کانوونی دووەم، هەریەکە لە سەرکردایەتی میسر و ئوردن بە توندی پێشنیازەکەی ترەمپیان رەتکردەوە و رایانگەیاند، دەبێت فەلەستینییەکان لە غەززە بمێننەوە.