سبەینێ لیژنە تەكنیكییەكانی نێوان پارتی و یەكێتی دواین كۆبوونەوەیان ئەنجام دەدەن
لۆگۆى یهكێتیی نیشتمانیی كوردستان و پارتى دیموكراتى كوردستان | فۆتۆ: SNN
SNN-عەلی حەمە سەعید
وابڕیارە سبەی چوارشەممە جارێكی دیكە لیژنەی هاوبەشی یەكێتی نیشتمانی كوردستان و پارتی دیموكراتی كوردستان، لە مەكتەبی سیاسی پارتی لە شاری هەولێر كۆدەبنەوە و ئەوەش دەبێتە دواكۆبوونەوەی ئەو لیژنە تەكنیكییە بۆ ئامادەكردنی رەشنوسێك لەبارەی حكومەتی داهاتووی هەرێمی كوردستان.
بەگوێرەی زانیارییەكانی SNNوابڕیارە سبەی چوار شەممە جارێكی دیكە هەردوو شاندی تەكنیكی پارتی و یەكێتی لە شاری هەولێر لە مەكتەبی سیاسی پارتی جارێكی دیكە كۆببنەوە و ڕەشنوسێكی تایبەت بە چۆنییەتی پێكهێنانی كابینەی نوێی حكومەتی هەرێم ئامادە بكەن.
ئاماژەی بەوەشكرد، ئەو ڕەشنوسەی كە لە لایەن ئەو لیژنە تایبەتەی یەكێتی و پارتی ئامادە دەكرێت، دەبێتە بنەما بۆ كۆبوونەوەی باڵای هەردوولا، هاوكات ڕەشنوسەكە بەرهەمی پێنج كۆبوونەوەی ڕابردووی هەردوو لیژنەی تەكنیكی پارتی و یەكێتی دەبێت.
هەر بە گوێرەی زانیارییەكانی SNNكۆبوونەوەكەی سبەی دەبێتە دواین كۆبوونەوەی ئەو دوو لیژنە تەكنیكییەی پارتی و یەكێتی، بەمەرجێك ئەگەر لە كۆبوونەوەی سبەی پێشهاتێكی نوێ نەیەتە كایەوە، هاوكات لە دوای كۆبوونەوەكەی سبەی وادەیەكی نزیكیش دادەنرێت بۆ ئەنجامدانی كۆبوونەوەی شاندی باڵای هەردوولا بۆ ئەوەی لەسەر بنەمای ڕەشنوسی لیژنەكان بڕیار لەسەر پێكهێنانی كابینەی نوێی حكومەتی هەرێم بدەن.
