کۆنفرانسی وزەی عێراق لە بەغدای پایته‌خت دەستیپێکرد

SNN-

ئەمڕۆ سێشەممە 28ی 1ی 2025، لە بەغدا کۆنفرانسی وزەی عێراق بۆ ماوەی دوو ڕۆژ دەستیپێکرد، لە ڕێگەی 14 پانێڵەوە، پرسی ژینگە، سەرچاوەکانی وزە و فرەیی ئابووریی عێراق و بەکارهێنانی وزەی پاک لەبری وزە نەریتییەکان، پرسە سەرەکییەکانی کۆنفرانسەکە دەبن.
چالاکییەکانی کۆنفرانسەکە بە ئامادەبوونی سەرۆکوەزیران و ژمارەیەک وەزیر و بەرپرس دەستیپێکردووە، ئامانجی کۆنفرانسەکە گفتوگۆیەکی ڕاستەوخۆ لە نێوان حکومەت وکەرتی تایبەت بۆ پەرەپێدانی پڕۆژەکانی وەبەرهێنانی وزە و تیشک خستنە سەر و بەرزکردنەوەی هاوبەشی گەشەپێدانی بەردەوام و وەبەرهێنانە لە عێراق.

محەمەد شیاع سودانی، سەرۆکوەزیرانی عێراق لە کۆنفرانسەکەدا وتاری پێشکەشکرد و رایگەیاند، 70%ى ئامانجى رێگرییان لە سووتانى گازى هاوەڵ بەدیهێناوە و تاوەکو پێنج ساڵى دیکە، 40%ى نەوت بۆ پیشەسازیى گۆڕاو بەگەڕ دەخەن و لە نەخشەى پڕۆژەى رێگەى گەشەپێداندا هێڵى گواستنەوەى نەوت و گازیان داناوە، “لە پشت بەخۆبەستن لە بەرهەمهێنانى سووتەمەنەییەکان نزیک دەبینەوە و کارمان لەسەر سوود بینینى زیاتر کردووە لە سامانى نەوت و وەبەرهێنانى گازى سروشتى و زیادکردنى بەرهەمهێنانى بەرهەمە نەوتییەکان.
باسی لەوەشکردووە: “بۆ بەستنەوەی ئاسیا، ئەوروپا و وڵاتانى ناوچەکە بە یەکترەوە، لە نەخشەى پڕۆژەى رێگەى گەشەپێدان دا هێڵى گواستنەوەى نەوت و گاز و پەیوەندییەکانیان داناوە، رێگەى گەشەپێدان 1,200 کیلۆمەتر دەبێت، لە رێگەى ئاسن و وشکانى پێکدێت بۆ گواستنەوەى گەشتیار و کاڵاى بازرگانى، بە 11 پارێزگای عێراق و هەرێمى کوردستان تێپەڕ دەبێت”.

بەگوێرەى پلانى وەزارەتى نەوتى عێراق، تاوەکو کۆتایی ئەم ساڵ سووتانى گازى هاوەڵى کێڵگەکانى نەوت 80% رادەگیرێت و لە کۆتایی 2027 بەتەواوى سووتانى ئەو گازە رادەگیرێت کە لەگەڵ دەرهێنانى نەوت دەسووتێت و یەکێکە لە هۆکارەکانى پیسبوونى ژینگە.