لە دادگای باڵای فیدڕاڵییەوە داوای هەڵوەشاندنەوەی سزای هاتووچۆی خاڵ بۆ خاڵ دەكرێت

SNN-عەلی حەمە سەعید

لە بەرامبەر هەڵوەشاندنەوەی سزای ڕسوماتی هاتووچۆ و سزای كامێرای خاڵ بۆ خاڵ، هاووڵاتییەكی هەرێمی كوردستان سكاڵای لەسەر هەریەكە لە سەرۆكی حكومەت و وەزیری ناوخۆی حكومەتی هەرێم لە دادگای باڵای فیدراڵی تۆماركرد.

بەگوێرەی زانیارییەكانی SNNسكاڵاكە لەلایەن (خالید مستەفا) لەدادگای باڵای فیدراڵی تۆماركراوە و لەسكاڵاكەدا داوا كراوە، دەسەڵاتی زیادكردنی سزا و ڕسوماتی هاتوچۆ لەوەزیری ناوخۆی هەرێم بسەندرێتەوە بۆ هەموو سزاكان پشت بەیاسای هاتوچۆی ژمارە 86ی ساڵی 2004 ببەسترێت.

ئاماژە بەوەشكراوە، سكاڵاكار داوا دەكات هەموو ئەو سزا و پێ بژاردن و ڕسوماتانەی لە دەرەوەی ئەو یاسایە دانراون هەڵبوەشێنرێنەوە، هاوكات سزای كامێرای خاڵ بۆ خاڵ بەنایاسایی دەزانرێت و داوای هەڵوەشاندنەوەی دەكرێت بەو پێیەی نازانرێت لەسەر سەرپێچیەك لە یەك ڕۆژدا چەند جارێك و لەكاتی نزیكی یەك شۆفێر سزا بدرێت لەسەر هەمان جۆری سەرپێچی.

هەر لە زانیارییەكانی SNNئەوەشهاتووە كە سكاڵاكار لە سكاڵاكەیدا داوای كردووە كە پێدانی ڕەسم و تێچوو بەكۆمپانیاكانی پشكنینی توندو تۆڵی ئۆتۆمبێل هەڵوەشێتەوە و بەپێی یاسا دەبێت ئەو پارانە بۆ حكومەت بێت و فەرمانگەی دەوڵەت وەریبگرێت.