ئێران: پلانى چۆڵکردنى کەرتى غەززە پێچەوانەى یاسا نێودەوڵەتییەکانە

SNN-

وەزارەتى دەرەوەى ئێران پێشنیارەکەى دۆناڵد ترەمپ-ى سەرۆکى ئەمەریکا بۆ چۆڵکردنى کەرتى غەززە بە هەوڵێک بۆ لەناوبردنى گەلى فەڵەستین ناو دەبات و دەشڵێت: ئەو پلانە پێچەوانەى یاسا نێودەوڵەتییەکانە.

ئیسماعیل بەقائیى، وتەبێژى وەزارەتى دەرەوەى ئێران رایگەیاند، پلانى چۆڵکردنى غەززە و کۆچ پێکردنى زۆرەملێى خەڵکى فەڵەستین بۆ وڵاتانى دراوسێ بەشێکە لە هەوڵەکانى ئیسرائیل بۆ لەناوبردنى تەواوەتى گەلى فەڵەستین، بۆیە هەر هەوڵێکى لەوشێوەیە رەتدەکەینەوە و بە توندی ئیدانەی دەکەین.

وتەبێژى وەزارەتى دەرەوەى ئێران وتیشی: پلانەکەى دۆناڵد ترەمپ پێچەوانەى بنەماکانى یاسا نێودەوڵەتییەکان و پەیماننامەى نەتەوەیەکگرتوەکانە.

ئەوە قسانەی وتەبێژی وەزارەتی دەرەوەی ئێران لە کاتێکدایە کە دۆناڵد ترەمپ رایگەیاند، دەبێت دانیشتوانی غەززە ئەو شارە جێبهێڵن و بۆ ئەو مەبەستەش قسەی لەگەڵ میسر و ئوردن کردووە تاوەکو هاووڵاتییانی غەززە وەربگرن.

هەروەها دوێنێ چوارشەممە لەکاتی کۆبوونەوەی لەگەڵ بنیامین نەتانیاهوو سەرۆکوەزیرانی ئیسرائیل جارێکی دیکە رایگەیاند: ترەمپ، پێویستە خەڵکی غەززە لە میسر و ئوردن جێگیر بکرێن، ئەمە سەرەڕای ئەوەی سەرۆکانی ئەو دوو وڵاتە قسەیەکی جیاوازیان کردووە لەوبارەیەوە، سەرۆکی ئەمریکا وتی، وڵاتانی دیکەش ئامادەن خەڵکی غەززە وەربگرن، بەڵام ناوی وڵاتەکانی نەهێنا.