هەرێم پابەندی رێكەوتنەكان بێت شایستە داراییەكانی خۆی وەردەگرێت

SNN

بەپێی راگەیەندراوێكی لیژنەی دارایی ئەنجومەنی نوێنەران، عەتوان عەتوانی سەرۆك و ژمارەیەك لە ئەندامانی لیژنەكە پێشوازیان لە وەفدێكی باڵیۆزخانەی ئەمریكا كرد، لە دیدارێكدا وردەكاری هەمواركردنەوەی ماددەی 12ی یاسای بودجەی گشتی فیدراڵی تایبەت بە بەرهەمهێنان و هەناردەكردنی نەوت، جگە لە خستنەڕوی ئاستەنگە داراییەكانی بەردەم عیراق و ئامادەكارییەكان بۆ ئامادەكردن و پەسەندكردنی خشتەی بودجەی 2025 تاووتوێ كرا.

لەم بارەوە عەتوا عەتوانی رایگەیاند، پێویستە هەرێم پابەند بێت بە پێدانی داهاتی ناوخۆ بە حكومەتی ناوەند لە بەرامبەر وەرگرتنی شایستە داراییەكانی، لەوانەش مووچەی فەرمانبەران و بودجەی پرۆژەكان، بەمەبەستی كۆتاییهێنان بە ناكۆكییە داراییەكانی هەردوولا.

لە ڕاگەیەندراوەكەدا هاتووە، لە كۆبوونەوەكەدا گفتوگۆ لەبارەی كاتی پەسەندكردنی خشتەی بودجە بۆ ساڵی 2025 كرا بە ئامانجی دەستپێكردنی پڕۆژەكان بەپێی خشتەی كاتی دیاریكراو، لەگەڵ تەئكیدكردنەوە لەسەر زیادكردنی داهاتی نا نەوتی، كەمكردنەوەی خەرجییەكان بۆ پڕۆژە ناپێویستەكان، وەبەرهێنان لە پڕۆژەی خزمەتگوزاری و پەروەردەیی و پاڵپشتیكردنی كەرتی تایبەت.