“ئەو بڕیارانەی لەبەرژەوەندی خەڵكی هەڵەبجەن وەزارەتی دارایی جێبەجێیان ناكات”

SNN-عەلی حەمە سەعید               

پەرلەمانتارێكی فراكسیۆنی یەكگرتوو لە پەرلەمانی كوردستان ئاماژە بەوەدەكات وەزارەتی دارایی ئەو بڕیارانەی كە لە بەرژەوەندی پارێزگای هەڵەبجە دەدرێن جێبەجێیان ناكات ئەگەر بڕیاری سەرۆكوەزیرانیش بێت.

كاوە عەلی، ئەندامی پەرلەمانی كوردستان لە فراكسیۆنی یەكگرتوو بە SNNی ڕاگەیاند: وەزارەتی دارایی هەرێم زۆرجار ئەو بڕیارانەی كە لەبەرژەوەندی هاووڵاتیانی هەڵەبجەیە جێبەجێیان ناكات، بەنمونە بڕیاری پێدانی ڕێژەی %20ی داهاتی مەرزەكان لەگەڵ ئەوەی لە 2024/2/22 كە نزیك دەبێتەوە لە یەك ساڵ دەرچووە، هەروەها نووسراوی ئەنجومەنی وەزیران كە 2024/7/21 واتا شەش مانگ زیاترە دەرچووە، نەچووەنەتە بواری جێبەجێكردن.

ئاماژەی بەوەشكرد، بریاری كاراكردنی بەڕێوەبەرایەتی گومرگی هەڵەبجە و گواستنەوە و دامەزراندن و دابینكردنی میلاك بۆ بەڕێوەبەرایەتیش جێبەجێ نەكراوە كە 2024/7/15 دەرچووە و تەنها 15 ڕۆژ بۆ جێبەجێكردنی دیاری كرابوو، ئەوەش لەلایەن وەزارەتی دارایی هەرێمەوە ڕێكارەكانی تەواو نەكراوە.

ئەو ئەندامەی پەرلەمانی كوردستان ئەوەشی خستەڕوو، ئەگەر ئەو بڕیارانە لەكاتی خۆیاندا جێبەجێبكرانایە ئەوا ئێستا سودێكی زۆریان بۆ هاووڵاتیان و ئیدارەی پارێزگاكەش دەبوو، بۆیە كاتی ئەوە هاتووە كە ئەنجومەنی وەزیران بەدواداچوون بكات بۆ ئەو بەڵێن و بڕیارانەی كە بۆ هەڵەبجە دەركراون بەڵام جێبەجێنەكراون.