“ترەمپ پابەندە بە کۆتایهێنان بە شەڕی ئۆکرانیا”

SNN-

مارکۆ روبیۆ، وەزیری دەرەوەی ئەمریکا و سێرگی لاڤرۆڤ، لە پەیوەندییەکی تەلەفۆنیدا دەربارەی کۆتاییهێنان بە شەڕی ئۆکرانیا و هێنانە کایەی ئاشتی گفتوگۆیانکرد.

وەزارەتی دەرەوەی ئەمریکا لە راگەیەندراوێکدا رایگەیاندووە، مارکۆ روبیۆ پابەندبوونی سەرۆکی ئەمریکای بە کۆتاییهێنان بە شەڕی ئۆکرانیا بۆ هاوتا رووسییەکەی دووپاتکردووەتەوە.

تامی بروس، وتەبێژی وەزارەتی دەرەوەی ئەمریکا رایگەیاند، جگە لە پرسی ئۆکرانیا، هەردوو وەزیر باسیان لە ئەگەری کارکردنی پێکەوەیی لەسەر چەند پرسێکی هاوبەشی دیکەش کردووە.

هاوکات وەزارەتی دەرەوەی رووسیاش لە راگەیەندراوێکدا باس لەوەدەکات، کە هەردوولا رێککەوتوون لەسەر هەماهەنگیکردن لە پرسە نێودەوڵەتییەکاندا، بەتایبەت لە پرسی ئۆکرانیادا، هەردوو وەزیرەکە، ئامادەیی خۆیان دەربڕیوە بۆ هەماهەنگیکردن لە پرسە نێودەوڵەتییە هەنووکەییەکاندا، لەوانە یەکلاییکردنەوەی پرسی ئۆکرانیا، دۆخی فەڵەستین و رۆژهەڵاتی ناوەڕاست و ناوچەکانی دیکە.