نوێترین زانیاری لەبارەی دەستپێكردنەوەی نەوتی هەرێم
SNN-عەلی حەمە سەعید
سەرۆكی فراكسیۆنی یەكێتی لە ئەنجومەنی نوێنەرانی عێراق ئاماژە بەوە دەكات دوای تێپەڕاندنی هەمواری پرۆژە یاسای بودجە لە پەرلەمان، لە ئێستادا هەرسی لایەنی عێراق و توركیا و هەرێمی كوردستان ئامادەكارییان كردووە بۆ ئەوەی لە نزیكترین كاتدا دەستبكرێتەوە بە هەناردەكردنەوەی نەوتی هەرێم بۆ بازاڕەكانی جیهان.
هەرێم كەمال ئاغا، سەرۆكی فراكسیۆنی یەكێتی لە ئەنجوومەنی نوێنەرانی عێراق بەSNNی رایگەیاند: دوای ئەوەی هەفتەی ڕابردوو لە ئەنجومەنی نوێنەران هەمواری پرۆژە یاسای بودجە پەسەندكرا و لە مادەی 12 باس لە هەناردەكردنەوەی نەوتی هەرێم كرابوو، لە ئێستادا سەرجەم هەنگاوەكانی دەستپێكردنەوەی هەناردەی نەوتی هەرێمی كوردستان كۆتاییان هاتووە و هەرسێ لایەنی عێراق و توركیا و هەرێمی كوردستانیش رازیین بە دەستپێكردنەوەی هەناردەی نەوت.
ئاماژەی بەوەشكرد، بەگوێرەی هەموارەكە هەناردەكردنەوەی نەوتی هەرێم لەژێرچاودێری و سەرپەرشتی كۆمپانیای سۆمۆ دەبێت، هاوكات یەكێكیش دەبێت لەچارەسەركردنی گرفتەكانی نێوان هەولێر و بەغدا لەبارەی هۆكاری دواكەوتنی مووچە لەكاتی خۆیدا، بۆیە بە هەناردەكردنەوەی نەوت هێندەی دیكە پەیوەندییەكانی عێراق و هەرێم ئاسایی تر دەبنەوە.
سەرۆكی فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، دەستپێكردنەوەی هەناردەكردنەوەی نەوتی هەرێم پاڵپشتییەكی باش دەبێت بۆ داهاتی عێراق، هاوكات بیانووەكانی بەغداش بۆ نەناردنی مووچە لەكاتی خۆیدا ناهێڵێت، بۆیە زۆر گرنگە هەردوو لایەنە هەرێم و بەغدا پابەند بن بەو ڕێككەوتنانەی كە بۆ چارەسەركردنی گرفتی مووچەی فەرمانبەرانی هەرێم لەسەری ڕێككەوتوون.
