لەبارەی بەرزركدنەوەی نرخی شتومەك لە مانگی ڕەمەزان هۆشداری دەدرێتە بازرگان و دوكاندارەكان

SNN-عەلی حەمە سەعید
لەگەڵ نزیك بوونەوە لە مانگی پیرۆزی ڕەمەزان، سەرۆكی لیژنە هاوبەشەكانی قایمقامییەتی سلێمانی جەخت لەوەدەكاتەوە لەمانگی ڕەمەزاندا سەردان و چاودێرییەكانمان لە بازاڕەكان چڕتر دەكەینەوە و ڕێگە بەهیچ لایەك نادەین مانگی ڕەمەزان بۆ بەرژەوەندی تایبەتی خۆی بقۆزێتەوە بە بەرزكردنەوەی نرخی شتومەك.

گۆران قادر، سەرۆكی لیژنە هاوبەشەكانی قایمقامییەتی سلێمانی بە SNNی ڕاگەیاند: لیژنە هاوبەشەكانمان لە ماوەكانی ڕابردوو بە كاری ڕۆژانەی خۆیان هەستاون و چاودێرێكی وردی بازاڕیان كردووە، بەڵام بەدڵنیاییەوە لە مانگی ڕەمەزاندا لەلایەك سەردان و چاودێرییەكانمان چڕتر دەكەینەوە، لە لایەكی دیكەشەوە ڕێگەنادین هیچ بازرگان و دوكاندارێك مانگی ڕەمەزان بۆ بەرژەوەندی تایبەتی خۆی بقۆزێتەوە بە بەرزكردنەوەی نرخی شمەك و كاڵا.

ئاماژەی بەوەشكرد، هەر بازرگان و دوكاندارێك بیەوێت لە مانگی ڕەمەزاندا شمەك و كاڵای كوالیتی خراپ یاخود ماوە بەسەر چوو ساغ بكاتەوە، ئەوە هیڵی سورە و بەهیچ جۆرێك جێگای قەبوڵكردن نابێت و بە گوێرەی یاسا لێپێچینەوەی لەگەڵدا دەكەین.

سەرۆكی لیژنە هاوبەشەكانی قایمقامییەتی سلێمانی ئەوەشی خستەڕوو، لە هەر دووكان و فرۆشگایەكدا شتومەكی بەسەرچوو هەبێت دەستی بەسەردا دەگیرێت ئەوا پسوڵەی ئاگاداركردنەوە یان پسووڵەی پێبژاردنی بۆ دەكرێت و لە هەندێك حاڵەتیشدا تا داخستنی دووكانەكەی سزا دەدرێن.