بۆ ڕێگری لەبڵاوبوونەوەی نەخۆشی تاعون هاوردەكردنی ئاژەڵی لەعێراقەوە بۆ هەرێمی کوردستان قەدەغەكرا
SNN-عەلی حەمە سەعید
بەڕێوەبەری گشتی سامانی ئاژەڵ لە وەزارەتی كشتوكاڵ و سەرچاوەكانی ئاوی حكومەت ئاماژە بەوەدەكات بەمەبەستی ڕێگریكردن لە بڵاوبوونەوەی نەخۆشی تاعون كە ئێستا لەناو ئاژەڵەكانی پارێزگاكانی عێراق بڵاوبووەتەوە، هاوردەكردنی ئاژەڵ لەعێراقەوە قەدەغەدەكەین.
فیراس سدیق، بەڕێوەبەری گشتی سامانی ئاژەڵ لە وەزارەتی كشتوكاڵ و سەرچاوەكانی ئاوی حكومەتی هەرێم بە SNNی ڕاگەیاند: لەگەڵ ئەوەی خۆشبەختانە تا ئێستا هیچ حاڵەتێكی توشبوون بە نەخۆشی تاعوون لەناو ئاژەڵەكانی هەرێم تۆمارنەكراوە، بۆیە بۆ پاراستنی سامانی ئاژەڵ لە هەرێمی كوردستان، بڕیارمان داوە هاوردەی هەموو جۆرە ئاژەڵێكی عێراق بۆ كوردستان قەدەغە بكرێت.
ئاماژەی بەوەشكرد، هەر لە چوارچێوەی ڕێگرییەكان بۆ بلاوبوونەوەی نەخۆشییەكە بڕیارمانداوە كە بەرهەمی ئەو ئاژەڵانەش قەدەغە بكرێت كە لە پارێزگاكانی عێراقەوە هاوردەی هەرێم دەكرێن وەك شیر و بەرهەمەكانی دیكەی سپیایی.
بەڕێوەبەری گشتی سامانی ئاژەڵ لەوەزارەتی كشتوكاڵ ئەوەشی خستەڕوو، هەر حاڵەتێكی بڵاوبوونەوەی ئەو نەخۆشییە هەبێت، دەبێت پشكنین بكرێت و بە زانستی بسەلمێنرێت، بۆیە تاوەکو ئێستا هیچ حاڵەتێك لە كوردستان تۆمار نەكراوە.
