ئەمرۆ هەڵبژاردنی پەرلەمانی ئەڵمانیا بەڕێوەدەچێت

SNN-

دەنگدەرانى ئەڵمانیا روو لە ناوەندەکانى دەنگدان دەکەن بەمەبەستى بەشداریکردن لە هەڵبژاردنى گشتى و پێشبینى گەڕانەوەى نەریتخوازەکان بۆ دەسەڵات دەکرێت.

بەیانی ئەمڕۆ یەک شەممە، ناوەندەکانى دەنگدان لە سەرتاسەرى ئەڵمانیا کرانەوە لەو هەڵبژاردنەى نەیتخوازەکان پێشەنگن و، چاوەڕوان دەکرێت راستڕەوى پەرگیر ئەنجامێکى پێوانەیى بەدەستبهێنێت.

زیاتر لە 59 ملیۆن دەنگدەر مافى دەنگدانیان هەیە لە نێوان کاتژمێر 8:00 تا 18:00 بەکاتى ناوخۆیى ئەو وڵاتە بەمەبەستى هەڵبژاردنى پێشوەختەى نوێنەران، کە دواى هەرەسهێنانى هاوپەیمانێتتییەکى ئۆلاف شۆلتس-ى راوێژکارى ئەڵمانی لە کۆتاییەکانى 2024، داواى ئەنجامدانى کرا.

لەم هەڵبژاردنەدا 29 پارتی سیاسیی بەشدارن، بەگوێرەی پێشبینییەکان، پێدەچێت لەنێوان پێنج بۆ هەشت لەو پارتانە، دەنگی پێویست بەدەستبهێنن بۆ مسۆگەرکردنی کورسییەکانی پەرلەمان، لەناو پارتە سیاسییەکانیشدا چوار رکابەری سەرەکی هەن، کە بەربژێرن بۆ پۆستی راوێژکاری ئەڵمانیا.

هاوپەیمانیی میرتس، کە پارتى یەکێتیی دیموکراتیی مەسیحى و یەکێتیی کۆمەڵایەتیی مەسیحى لەخۆدەگرێت، لە پێشەنگى راپرسییەکاندایە، بەڵام پێشبینى ناکرێت زۆرینە بباتەوە، بەوەش ناچاردەبێت بۆ پێکهێنانى ئیدارەى نوێى داهاتووى بەدواى هاوبەش و دروستکردنى هاوپەیمانیدا بگەڕێت.

ئەم هەڵبژاردنە بۆ ئەڵمانیا یەکلاکەرەوە دەبێت، لەکاتێکدا ئەوروپا رووبەڕووی بڕیارەکانی ئیدارەی نوێی ئەمریکا دەبێتەوە، بەتایبەتی شەڕی ئۆکرانیا و هەڕەشەکانی دۆناڵد ترەمپ بۆ سەپاندنی باجی توند بەسەر هەناردەی ئەوروپادا.