تەیف سامی بۆ شاندی هەرێم: ئەوەی ئێوە دەیكەن پێچەوانەی ڕێككەوتنەكەمانە و بڕیار لای سودانییە
تەیف سامی- وەزیری دارایی عێراق
SNN-عەلی حەمە سەعید
ماوەی دوو ڕۆژە شاندێكی تەكنیكی وەزارەتی دارایی هەرێم لە بەغدان و دوێنێ لەگەڵ تەیف سامی وەزیری دارایی عێراق كۆبوونەتەوە، وەزیری دارایی بەڕوونی پێی وتوون ئەو بڕە داهاتەی ناردوتانە پێچەوانەی ڕێككەوتنەكانە و ناچمە ژێرباری ناردنی پارە.
بەگوێرەی زانیارییەكانی SNNكە لەبەرپرسێكی وەزارەتی دارایی هەرێم وەریگرتوون ئەوەخراوەتەڕوو، لەگەڵ ئەوەی وەزیری دارایی عێراق داوایكردووە بە خێرایی ( ئایبان)ی سەرجەم ئەو فەرمانبەرانەیان بۆ ڕەوانە بكرێت كە ژەماری بانكییان بۆ كراوەتەوە، لە هەمان كاتیشدا ناڕەزایەتی خۆی نیشانداوە لەبارەی ناردنی ئەو 51 ملیار دینارەی كە وەك داهاتی نانەوتی بۆ عێراق نێردراوە.
ئاماژەی بەوەشكرد، تەیف سامی وەزیری دارایی عێراق دوێنێ بە شاندە تەكنیكییەكەی هەرێمی ڕاگەیاندووە كە ئەوەی ئێوە دەیكەین پێچەوانەی ڕێككەوتنەكەمان و هەروەها پێچەوانەی بڕیارەكانی دادگای فیدراڵیشە، چونكە دەبوو مانگانە لە نێوان 80 بۆ 90 ملیار دینار ڕەوانەی عێراق بكەنەوە وەك داهاتی نانەوتی، بۆیە ناچمە ژێرباری ناردنی پارە بەم شێوەیەی ئێستا.
ئەو بەرپرسەی وەزارەتی دارایی هەرێم ئەوەشی وت، وەزیری دارایی عێراق بەڕوونی ئەوەی بە شاندەكەی هەرێم وتووە، من بۆخۆم ناتوانم واژۆ لەسەر ناردنی پارە بكەم بۆ مووچەی فەرمانبەرانی هەرێم بەم دۆخەی ئێستاوە، بۆیە ئەگەر ( محەمەد شیاع سودانی) سەرۆك وەزیران بچێتە ژێرباری بەرپرسیارێتی ئەو بابەتە ئەوكات ئامادەم واژۆی ناردنی پارە بكەم.
