لەسەر داوای پەرلەمانتارێكی یەكێتی، وەزیری ژینگەی عێراق 30 هەزار نەمام ڕەوانەی هەڵەبجە دەكات

SNN-عەلی حەمە سەعید

لەسەروبەرندی نزیك بوونەوە لە 37 هەمین ساڵیادی تاوانی كیمیابارانی هەڵەبجە، لەسەر داوای پەرلەمانتارێكی یەكێتی وەزیری ژینگەی عێراق 30 هەزار نەمامی جۆراوجۆر بۆ پارێزگای هەڵەبجە دەنێرێت و دەست بەناشتنیان دەكرێت.

چرۆ حەمەشەریف، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: دوای ئەوەی لە نوسراوێكماندا وەك فراكسیۆنی یەكێتی داوامان لە وەزارەتی ژینگەی عێراق كرد كە ژمارەیەك نەمام بۆ هەڵەبجە تەرخانبكات، وەزیری ژینگەی عێراق بەداواكارییەكەمان ڕازی بووە و بڕیاریدا بەناردنی 30 هەزار نەمامی جۆراو جۆر.

ئاماژەی بەوەشكرد، ئەمڕۆ بەشێك لەو نەمامانە گەیشتوونەتە هەڵەبجە و سبەینێش ژمارەیەكی دیكەیان دەگەن، هاوكات بەهەماهەنگی لەگەڵ شارەوانی و چالاكوانانی ژینگە و ڕێكخراوە ژینگەییان دەستدەكەین بەناشتنی نەمامەكان، ئەوەش لە چوارچێوەی بەرز ڕاگرتنی ساڵیادی كیمیابارانی هەڵەبجەیە كە 16/3 هەموو ساڵێك بەڕێوەدەچێت.

ئەو پەرلەمانتارەی فراكسیۆنی یەكێتی ئەوەشی خستەڕوو، نەمامەكان بەزۆری لە جۆری زەیتون وچەند جۆرێكی دیكەی نەمام پێكهاتوون كە لەگەڵ ژینگە و كەشوهەوای هەڵبجە دەگونجێن، بە ناشتنی ئەو 30 هەزار نەمامەش هێندەی دیكە ژینگە و سروشتی هەڵەبجە سەوز تر دەبێت.