ئیمامئۆغڵو لەسەر دۆسیەی تیرۆر و گەندەڵی دەستگیرکرا

SNN-

سەرۆکی شارەوانیی ئیستانبوڵ لەسەر دۆسیەی تیرۆر و چەند دۆسیەیەکی دیکە دەستگیرکرا.

داواکاریی گشتیی ئیستانبوڵ راگەیەندراوێکی بڵاوکردەوەو تێیدا هاتووە، لە چوارچێوەی ئەو دۆسیانەی لەلایەن داواکاریی گشتیی ئیستانبوڵ لەسەری کراونەتەوە و بە تۆمەتی “تیرۆر، گەندەڵی و بەرتیلدان”، ئەکرەم ئیمامئۆغڵو، سەرۆکی شارەوانیی ئیستانبوڵ و دەیان کەسی دیکە دەستگیرکران.

لەسەر دۆسیەکانی داواکاریی گشتیی، تاوەکو ئێستا بڕیاری دەستگیرکردن بۆ 100 کەس دەرچووە، کە دیارترینیان بریتین لە سەرۆکی راوێژکارانی ئیممائۆغڵو و سەرۆکی شارەوانییەکانی بەیلیکدوزو و شیشلی سەر بە ئیستانبوڵ.

هاەروەها لە راگەیەندراوەکەی داواکاریی گشتیی ئیستانبوڵدا هاتووە، ئیمامئۆغڵو و تۆمەتبارەکانی دیکە تۆمەتبارن بە “تیرۆر، بەڕێوەبردنی رێکخراوی تاوانکاریی، ئەندامبوون لە رێکخراوی تاوانکاریی، بەرتیلدان، ساختەکاریی، فریودان، بەدەستهێنانی پارە بە رێگەی نایاسایی و دەستوەردان و گەندەڵی لە بەڵێندەرایەتیی، ئیمامئۆغڵو و شەش لەو کەسانەی بڕیاری دەستگیرکردنیان هەیە تۆمەتبارن بە “هاوکاریکردنی کەجەکە و پەکەکە.”

ئیمامئۆغڵو پێش دەستگیرکردنی ڤیدیۆیەکی بڵاوکردەوە وتویەتی، “کۆڵنادەم و خۆم دەخەمە ئەمانەتی گەلەکەمەوە، سەدان پۆلیس هاتوونەتە بەر دەرگاکەم، سەرۆککۆمار و ئەوانەی کە ئەم کارە دەکەن لە بەردەم دادگادا حساب و کیتابی خۆیان لەگەڵ دەکرێت.”

هاوکات دوای دەستگیرکردنی ئیممائۆغڵو، پارێزگای ئیستانبوڵ بڕیاریدا بۆ ماوەی چوار رۆژ هەموو جۆرە چالاکیی، کۆنفرانسێکی رۆژنامەوانیی، ناڕەزایەتیی و خۆپیشاندانێک قەدەغە بکات، بە ئامانج لە بڕیارەکەیان پاراستنی ئاسایشی گشتیی و رێگرتنە لە کاری تێکدەرانە.