چوار ڕۆژە شاندێكی وەزارەتی دارایی هەرێم لەبەغدان ودەیانەوێت پێش جەژن مووچە دابەشبكرێت

SNN-عەلی حەمە سەعید

لە ڕۆژی چوارشەممەی هەفتەی ڕابردووەوە شاندێكی تەكنیكی وەزارەتی دارایی هەرێم لەگەڵ خۆیاندا لیستی مووچەی مانگی سێی فەرمانبەرانی هەرێمیان بردووەتە بەغدا، شاندەکە هێشتا نەگەڕاونەتەوە و دارایی عێراقیش دەستی بەوردبینی كردووە.

بەگوێرەی ئەو زانیارییانەی كە SNN لە بەرپرسێكی وەزارەتی دارایی هەرێم وەریگرتوون ئەوەخراوەتەڕوو، ماوەی چوار ڕۆژە شاندێكی تەكنیكی وەزارەتی دارایی هەرێم لە بەغدا ماونەتەوە و بە هەماهەنگی لەگەڵ شاندێكی تەنكیكی وەزارەتی دارایی عێراق سەرقاڵی وردبینیكردنن لە لیستی مووچەی مانگی سێی فەرمانبەرانی هەرێم.

ئاماژەی بەوەشكرد، مانەوەی ئەو شاندەی هەرێم لە بەغدا بۆ ئەوەیە كە لەكاتی وردبینی لە لیستەكە هەر سەرنج و تێبینییەك لەلایەن وەزارەتی دارایی عێراق هەبوو ئەوان بتوانن وەڵامیان بدەنەوە و گرفتەكانی چارەسەر بكەن، بۆ ئەوەی هەرچییان كردووە بتوانن پێش جەژن بڕیار لەسەر ناردنی پارەی مووچەخۆرانی هەرێم بدرێت.

ئەو بەرپرسەی وەزارەتی دارایی هەرێم ئەوەشی خستەڕوو، دوای وردبینكردنی لیستەكە پێویستە ( تەیف سامی) وەزیری دارایی عێراق واژۆ لەسەر لیستەكە بكات و پاشان فەرمان دەربكات بۆ تەمویلكردنی پارە، بەڵام ئەگەر واژۆی نەكرد ئەوا جارێكی دیكە دەگەرێتەوە بۆ ( محەمەد شیاع سودانی) سەرۆك وەزیرانی عێراق وەك ئەوەی لەمانگی ڕابردوو كردی، ئەوەش كاتی زیاتر دەوێت ئەگەر ئەوە ڕووبدات پێناچێت بتواندرێت پێش جەژن مووچە دابەشبكرێت.