“دەستووری عێراق رێگە نادات هیچ گروپێکی چەکداری لە دەرەوەی دامەزراوە سەربازییەکان هەبێت”

SNN-

فوئاد حسێن، وەزیری دەرەوەی عێراق لەمیانی چاوپێکەوتنێکیدا لەگەڵ کەناڵی شەرقییە رایگەیاند، “عێراق بەشێک نییە لە بەرەی موقاوەمە و هەر گروپێک لە دەرەوەی چوارچێوەی دەوڵەت نایاساییە.”

ئاماژەی بەوەشکرد، “دەستووری عێراق رێگە نادات هیچ گروپێکی چەکدار لە دەرەوەی دامەزراوە سەربازییەکانی عێراقدا بوونی هەبێت، رێگەپێدراویش نییە بە بڕیاری تاکلایەنە بڕیاری جەنگ بدرێت”.

لەبارەی هێرشی گروپە چەکدارەکان بۆسەر ئیسرائیل فوئاد حسێن باسی لەوەکرد، “ئەوەی گروپە چەکدارەکانی عێراق لە چەند مانگی رابردوو ئەنجامیاندا، زیانی بە عێراق گەیاندووە و هیچ سوودێکیشی بۆ دۆزی فەڵەستین نەبوو، ئەگەر ئێران ببێتە ئامانجی هێرشی ئیسرائیل و رێککەوتن شکست بهێنێت، ئەوا عێراق و ناوچەکدا رووبەڕووی کارەسات دەبنەوە.”

وەزیری دەرەوەی عێراق، ئاماژەی بەوەشکرد، “دەرفەتێک هەیە بۆ لێکتێگەشتن لەگەڵ گروپە چەکدارەکان و دوورکەوتنەوە لە مەترسییەکانی هێرشی ئەمریکی یان ئیسرائیلی بۆسەر عێراق.”