قەدەغەی هاوردەكردنی تەماتە نرخەكەی لە بازاڕەكانی هەرێم بەرز دەكاتەوە

SNN-عەلی حەمە سەعید

بە وتەی بەرپرسی سەندیكای عەلوەی سلێمانی، بەهۆی قەدەغەكردنی هاوردەكردنی تەماتە لە ئێرانەوە، بووەتە هۆی بەرز بوونەوەی نرخی تەماتە، بەجۆرێك هەر كیلۆیەك تەماتە 500 دیناری چووەتە سەر نرخەکەی و ئەمڕۆ كیلۆیەك تەماتە بە هەزار و 100 دینار لە عەلوە فرۆشراوە، بە هەزار و 500 دیناریش دەدرێتە هاووڵاتیان.

سەروەر عەلی، بەرپرسی سەندیكای عەلوەی سلێمانی بە SNNی ڕاگەیاند: بەهۆی ئەوەی وابڕیارە كە لە 26ی ئەم مانگەوە هاوردەكردنی تەماتە لە دەرەوە بەتایبەت ئێران قەدەغە بكرێت و هاوكات ئەو وادەیەش نزیكە لە ڕۆژانی جەژنی ڕەمەزان، ئەمە وایكردووە كە هەر لە ئێستاوە نرخی تەماتە بەرز ببێتەوە و ئەمڕۆ كیلۆیەك تەماتەمان بە هەزار و 100 دینار داوەتە خاوەن دووكانەكان.

ئاماژەی بەوەشكرد، لە ڕۆژانی ڕابردوو كیلۆیەك تەماتە بە 650 دینار دەدریە دوكاندارەكان و ئەوانیش بە هەزار دینار دەیانفرۆشتەوە بەهاووڵاتیان، بەڵام ئەمڕۆ نرخی یەك كیلۆ تەماتە لە عەلوە بەر هەزار و 100 دینارە و لە بازاڕەكاندا كیلۆی هەزار و 500 دینار بەرەو سەرەوەیە.

بەگوێرەی بەدواداچوونەكانی SNNئەم بەرز بوونەوەیەی نرخی تەماتە تەنها لە عەلوەی سلێمانی نییە بەڵكوو لە عەلوەكانی هەولێر و دهۆكیش بەرهەمان شێوە بەرز بووەتەوە، ئەوەش لە پێناو ساغكردنەوەی بەرهەمی ناوخۆی جوتیارانی عێراق و هەرێمی كوردستان ئەو بڕیارە دراوە.