سەردانیکەرانی دوو مزگەوت لە رەمەزاندا 122 ملیۆن کەسی تێپەڕاندووە

SNN-

سعودیە رایگەیاند، ژمارەی عومره‌كاران و سەردانیکەرانی دوو مزگەوتی پیرۆز لە مانگی رەمەزاندا 122 ملیۆن کەسی تێپەڕاندووە، لەنێویاندا حاجی و نوێژخوێنانی مزگەوتی گەورە و مزگەوتی پێغەمبەر (د.خ).

لە بەیاننامەی دەسەڵاتی گشتی بۆ چاودێریکردنی کاروباری مزگەوتی گەورە و مزگەوتی پێغەمبەردا (د.خ) هاتووە، ژمارەی سەردانیکەرانی دوو مزگەوتی پیرۆز لە مانگی رەمەزاندا 122 ملیۆن و 286 هەزار و 712 کەس بووە.

ژمارەی عومره‌كاران لە مانگی رەمەزاندا گەیشتوەته‌ 16 ملیۆن و 558 هەزار و 241 کەس، لە کاتێکدا بە گشتی 75 ملیۆن و 573 هەزار و 928 کەس لە مزگەوتی گەورە نوێژیان کردووە و ژمارەی نوێژخوێنانی مزگەوتی پێغەمبەر گەیشتوه‌تە 30 ملیۆن و 154 هەزار و 543 کەس.

دەسەڵاتی گشتی بۆ چاودێریکردنی کاروباری مزگەوتی گەورە و مزگەوتی پێغەمبەر تەکنەلۆژیای پێشکەوتوو بەکاردەهێنێت کە پشت بە هەستەوەری خوێنەر دەبەستێت بۆ چاودێریکردنی ژمارەی نوێژخوێنان و حاجیان و عومرەکاران.