SNN-
وه‌زاره‌تی كشتوكاڵ و سه‌رچاوه‌كانی ئاوی حكومه‌تی هه‌رێمی كوردستان ناوی شه‌ش هه‌زار و (118) فه‌رمانبه‌ری بڵاوكردەوە كە سودمه‌ندده‌بن له پرۆسه‌ی وه‌رگرتنی زه‌وی له پارێزگاكان و ئیداره سه‌ربه‌خۆكان.
وه‌زاره‌تی كشتوكاڵ و سه‌رچاوه‌كانی ئاوی حكومەتی هەرێمی كوردستان رایگەیاند، دوا به‌دوای بڕیاری ئه‌نجومه‌نی وه‌زیران و ده‌رچونی رێنمایی وه‌زاره‌تی شاره‌وانی و گه‌شتوگوزار، بۆ دابه‌شكردنی زه‌وی نیشته‌جێبون به‌سه‌ر فه‌رمانبه‌ران و خانه‌نشینان، وه‌زاره‌تەكە بڕیاریدا به پێكهێنانی لیژنه‌ی تایبه‌ت بۆ هه‌ماهه‌نگی له‌گه‌ڵ وه‌زاره‌تی شاره‌وانی و پێدانی رێنمایی بۆ شێوازی پڕكردنه‌وه‌ی فۆڕمه‌كان و چۆنیه‌تی شیكردنه‌وه‌ی ڕێنماییه‌كان.
ئاماژەی بەوەشکردووە، سه‌رئه‌نجام له وه‌زاره‌تی كشتوكاڵ و سه‌رچاوه‌كانی ئاو له‌م لیسته‌دا شه‌ش هه‌زار و (118) فه‌رمانبه‌ر سودمه‌ندبون له وه‌رگرتنی زه‌وی، به‌پێی سنوری پارێزگاكان و ئیداره سه‌ربه‌خۆكان.
رونیشیکردۆتەوە، گه‌ڕانه‌وه‌ی ناوی سودمه‌ندان له‌لایه‌ن وه‌زاره‌تی شاره‌وانی و گه‌شتو گوزار به‌پێی كارتی زانیاری بوه، واته كارتی زانیاری بۆته بنه‌ما بۆ دابه‌شكردنی زه‌وییه‌كان به‌سه‌ر سنوری پارێزگاكان و ئیداره سه‌ربه‌خۆكان.
وه‌زاره‌تی كشتوكاڵ و سه‌رچاوه‌كانی ئاو باسی لەوەشکردووە، دوایی وردبینی و پێداچونه‌وه سه‌رجه‌م فۆڕمی سودمه‌ندان له‌دیوانی وه‌زاره‌ته‌وه ئاراسته‌ی وه‌زاره‌تی شاره‌وانی و گه‌شتو گوزار كراوە ره‌زامه‌ندی وه‌رگیرا، بۆ ئه‌نجامدانی كاری پێویست لیستەكان ئاراسته‌ی سه‌رۆكایه‌تی شاره‌وانییه‌كان له پارێزگاكان و ئیداره سه‌ربه‌خۆكان ده‌كرێت.
