بەرپرسانی ئەمریکا وەڵامی داواکارییەکانی خۆپیشاندەرانیان دایەوە

SNN

بەرپرسانی ئەمریکا بەشێک لە داواکارییەکانی ئەو خۆپیشاندانانەیان دایەوە، کە لە ماوەی ئەم هەفتەیەدا دژ بە جیاکاری رەگەزی لە سەرتاسەری ئەمریکا بەڕێوەچوون.

لە وەڵامی داوای خۆپیشاندەراندا، هەموو ئەو پۆلیسانەی کە دەستیان لە کوشتنی جۆرج فلۆید، پیاوێکی رەشپێستدا هەبووە و پێشتر لە کارەکانیان دوورخراونەتەوە، سزاکانیان قورستر کرا و رووبەڕووی تۆمەتی کوشتنی بێ مەبەست کرانەوە.

سێ ئەفسەری پۆلیسی دیکە کە لە شوێنی رووداوی کوشتنی ئەو پیاوەدا لەوێ بوون، تۆمەتبارن بە هاوکاریکردنی بکوژی فلۆید.

ماوەی هەشت رۆژە خۆپیشاندان دژی جیاکاری رەگەزی لە ئەمریکا بەڕێوەدەچێت، خۆپیشاندانەکان لە بەشێک لە ناوچەکان پشێوی تێکەوتووە و خۆپیشاندەران هێرشیان کردووەتە سەر بنکەکانی پۆلیس و لە چەند شارێک چەندین رووداوی تاڵانکاری لە دوکان و شوێنکارەکان روویداوە.