نرخی زێڕ ئاستێکی مێژووی تۆمارکرد

SNN

نرخی زێڕ بەهۆی نائارامییەکانی ئابوری ئەمریکا و چین بەردەوامە لە بەرزبوونەوە و بۆ ئەمڕۆش ژمارەی پێوانەیی تۆمارکرد، بە جۆرێک نرخی یەک ئۆنسە زێڕ گەیشتە نزیکەی سێ هەزار و 212 دۆلار، بەو پێیەش نرخی زێڕ لە بازاڕەکانی هەرێمی کوردستان بەرزبووەتەوە.

بەگوێرەی ئابوریناسان، بازرگانان بەهۆی کاریگەرییەکانی ئەو شەڕە ئابوورییەی لەنێوان چین و ئەمریکادا هەیە، روو لە کڕینی زێڕ دەکەن وەکو کانزایەکی پارێزراو، ئەمەش وایکردووە نرخی زێڕ بەرزببێتەوە و ئاستێکی مێژووی تۆمار بکات.

بە جۆرێک بۆ ئەمڕۆ نرخی ئۆنسەیەک زێڕ بۆیەکەمجار گەیشتە سەرو 3,200 دۆلار، لە هەرێمی کوردستانیش نرخی مسقاڵێک زێڕی عەیارە 21 گەیشتە 681,000 دینار، ئەوەش بەرزترین نرخە تا ئێستا تۆمار کرابێت، یەک کیلۆ زێڕیش بە  103.322 دۆلارە.

بەگوێرەی سەندیکای زێڕنگران، ئەمڕۆ مسقاڵێک زێڕ لە بازاڕەکانی هەرێمی کوردستان بەمشێوەیە:

یەک مسقاڵ زێڕی عەیارە 18 بە 583.000 دینارە

یەک مسقاڵ زێڕی عەیارە 21 بە 681.000 دینارە

یەک مسقاڵ زێڕی عەیارە 24 بە 779.000  دینارە.