كۆمیسیۆن دەستبە تۆماركردنی لیست و قەوارەكان دەكات بۆ بەشداریكردنیان لە هەڵبژاردن

SNN-عەلی حەمە سەعید

سەرۆكی تیمی رۆژنامەوانی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات لە 15ی ئەم مانگەوە تا چواری مانگی داهاتوو كۆمیسیۆن دەرگای تۆماركردنی ناوی پارت، هاوپەیمانێتی و لیستە سەربەخۆكان بۆ هەڵبژاردنی پەرلەمان دەكاتەوە، ئەوەش وەك ئامادەكارییەك بۆ بەڕێوەبردنی هەڵبژاردن لە 11/11/2025

عیماد جەمیل، سەرۆكی تیمی رۆژنامەوانی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: وەك ئامادەكارییەك بۆ بەڕێوەبردنی هەڵبژاردن لە 11/11/2025 ئەنجوومەنی كۆمیسیارانی سەر بەكۆمیسیۆنی باڵای سەربەخۆی هەڵبژاردنەكان بڕیاریداوە كە 15/4/2025  دەرگای تۆماركردنی پارت، هاوپەیمانێتی و لیستە سەربەخۆكان دەكرێتەوە و تا بەرواری 4/5/2025 بەردەوامی دەبێت.

ئاماژەی بەوەشكرد، ئەو تۆماركردنە هەموو ئەو پارتانە دەگرێتەوە كە لە فەرمانگەی پارت و رێكخراوەكان ناویان تۆمار كردووە، هاوكات ئەو كەسانەشی دەیانەوێت بە لیستی سەربەخۆ بەشداری هەڵبژاردن بكەن بەهەمان شێوە دەتوانن لەو ماوەیەدا ناوخۆیان تۆمار بكەن.

تۆماركردنی ناوی لیست و هاوپەیمانییەكان بۆ بەشداری لەهەڵبژاردنی پەرلەمانی عێراق لەكاتێكدایە كە سەرۆك وەزیرانی عێراق ڕۆژی 11/11/2025 ی دیاركردووە بۆ بەڕێوەبردنی هەڵبژاردن، هاوكات هاوپەیمانیی بەڕێوەبردنی دەوڵەت رێككەوتن هەڵبژاردنی پەرلەمانی عێراق بەگوێرەی ئەو یاسایە بكرێت، كە ئێستا هەیە بەبێ ئەوەی هەموار بكرێتەوە.