SNN-عەلی حەمە سەعید
نوێنەرێكی هەڵەبجە لە پەرلەمانی عێراق ئاماژە بەوەدەكات كۆبوونەوەی ئەمڕۆی پەرلەمانی عێراق تا ئێستا بەڕێوەنەچووە ئەوەش بەهۆی ئەوەی ژمارەیەكی كەم پەرلەمانتار ئامادەن كە نیسابی یاسایی تەواو ناكەن، جەختیش دەكاتەوە ئەگەر ئەمڕۆ كۆبوونەوە نەكرێت، ئێمە سبەی بەشداری كۆبوونەوەی پەرلەمان نابین.
چرۆ حەمە شەریف، پەرلەمانتاری فراكسیۆنی یەكێتی و نوێنەری هەڵەبجە لە پەرلەمانی عێراق بە SNNی راگەیاند: تا ئێستا ژمارەی یاسایی پەرلەمانتاران بۆ بەڕێوەچوونی دانیشتنی پەرلەمان ئامادە نەبوون كە دەبێت بە پێی یاسا 163 پەرلەمانتار ئامادە بن پاشان كۆبوونەوە بەڕێوەبچێت.
ئاماژەی بەوەشكرد، لەگەڵ ئەوەی پێناچێت ئەمڕۆ كۆبوونەوەی پەرلەمان بەڕێوەبچێت، بەلام ئێمە چاوەڕێدەكەین ئەگەریش لە كۆتایدا كۆبوونەوەی پەرلەمان بەڕێوەنەچوو، ئەوا ئێمەش وەك كوتلە كوردستانییەكان بەشداری كۆبوونەوەكەی سبەی و هیچ كۆبوونەوەیەكی دیكەی پەرلەمان ناكەین تا ئەوكاتەی پرۆژەیاسای بە پارێزگاكردنی هەڵەبجە تێدەپەڕێندرێت و لەسەر هەلوێستی خۆمان سوورین.
ئەو ئەندامەی پەرلەمانی عێراق ئەوەشی خستەڕوو، بابەتەكە بەسیاسی كراوە، چونكە كاتێك ڕووبەڕوو قسە لەگەڵ كوتلە جیاوازەكان دەكەین دەڵێن ئامادەین دەنگ بەو پرۆژەیاسایە بدەین، بەڵام كاتێك بڕیار لەسەر دانیشتنی پەرلەمان دەدرێت ئامادەی دانیشتنەكان نابن.
