“بەیەك دەنگیمان توانیمان وەفایەكی بچوك بۆ هەڵەبجە بنوێنین”

SNN-عەلی حەمە سەعید

ئەندامێكی ئەنجومەنی نوێنەرانی عێراق ئاماژە بەوەدەكات ئەو هەڵوێستە یەكگرتوویەی فراكسیۆنە كوردییەكان ئەمڕۆ هەمان بوو سەلماندی هەموومان خۆمان بەقەرزاری خوێنی شەهیدانی هەڵەبجە دەزانین، هەر بەك دەنگیمان توانیمان وەفایەكی بچوك بۆ شەهیدانی هەڵەبجە بنوێنین.

چرۆحەمە شەریف، نوێنەری هەڵەبجە لە پەرلەمانی عێراق و پەرلەمانتاری فراكسیۆنی یەكێتی بە SNNی ڕاگەیاند: دوای چەندین جار كۆبوونەوە و شكست هێنان بە كۆبوونەوەكان و دروستكردنی كێشە و گرفت بۆ پرۆژەیاسای بە پارێزگاكردنی هەڵەبجە، بەڵام دواجار توانیمان بەیەكگرتوویمان بەسەر گرفتەكاندا زاڵ ببین.

ئاماژەی بەوەشكرد، ئەم یەكدەنگی و یەك هەڵوێستییەی فراكسیۆنە كوردییەكان ئەمڕۆ هەمان بوو لەسەر ئەو پرسە زۆر گرنگ و پێویست بوو، چونكە بۆ هەموو لایەكمان سەلماند كە ئەگەر لە بابەتێكی دیكەدا یەك دەنگ نەبین ئەوا لە پشتیوانیكردنی مافەكانی هاووڵاتیان بەگشتی و دۆسیەی قوربانیانی هەڵەبجە و كەسوكاری شەهیدان هەموومان یەك دەنگین.

ئەو پەرلەمانتارەی یەكێتی ئەوەشی خستەڕوو، ئێستا هەڵەبجە بووەتە 19 هەمین پارێزگای عێراق و لەدوای بڵاوكردنەوەی پرۆژەیاساكە لە ڕۆژنامەی وەقایع یاساكە بەتەوای دەچێتە بواری جێبەجێكردنەوە.