لەپەرلەمانی عێراقەوە واژو كۆدەكرێتەوە بۆ زیادكردن و گۆڕانكاری لە پێدانی مووچە

SNN-عەلی حەمە سەعید

ئەندامێكی ئەنجومەنی نوێنەرانی عێراق ئاماژە بەوەدەكات بە مەبەستی ئەنجامدانی گۆڕانكاری لە پێدانی مووچە بەفەرمانبەران و هاوكات نەهێشتنی نایەكسانی لە پێدانی مووچە، لەلایەن پەرلەمانتارانەوە دەستكراوە بە كۆكردنەوەی واژو بۆ بانگهێشتكردنی لیژنەیەكی حكومی.

كاروان یاروەیس، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: ماوەی چەند ڕۆژێكە دەستكراوە بە كۆكردنەوەی واژوی پەرلەمانتاران بە مەبەستی میوانداریكردنی لیژنەیەكی حكومەت، كە ئەركی زیادكردنی مووچە و گۆڕانكاری بووە لە خشتەی مووچەی فەرمانبەرانی حكومەت لە وەزارەتە جیاوازەكان، بۆ ئەومەبەستەش تا ئێستا زیاد لە 100 پەرلەمانتار واژومان لەسەر ئەو بانگهێشتكردنە كردووە.

ئاماژەی بەوەشكرد، كاری ئەو لیژنەیە زیادكردنی مووچە و گۆڕانكاری بووە لە خشتەكەیدا لەپێناو نەهێشتنی نادادی لە نێوان مووچەی پلە باڵاكان و فەرمانبەرانی ئاسایی، بەڵام ماوەی سێ‌ ساڵە ئەو لیژنە حكومییە هیچ كارێكی ئەوتۆیان نەكردووە بۆ زیادكردنی مووچە و نەهێشتنی نادادی، بۆیە ئامانج لەو میواندارییە بۆ یەكلاكردنەوەی ئەو پرسە و نەهێشتنی جیاوازی لە مووچەی نێوان فەرمانبەرانی ئاسایی و پلە باڵاكانە.

ئەو ئەندامەی ئەنجومەنی نوێنەرانی عێراق ئەوەشی خستەڕوو، ئێمە واژوومان لەسەر ئەوە كردووە كە دەمانەوێت ئەو لیژنە حكومییە بانگهێشتی پەرلەمان بكرێن بۆ ئەوەی هۆكاری دواكەوتنی یەكلاكردنەوەی ئەو دۆسیەیە بزانرێت دەبێت كە جیاوازی مووچە لە نێوان پلە باڵاكان و فەرمانبەرانی ئاسایی كەم دەكاتەوە.